Эўрапейскі саюз футбольных асацыяцый (UEFA) на экстраным пасяджэньні 30 ліпеня, вырашыў байкатаваць спаборніцтвы пад эгідай Міжнароднай фэдэрацыі футболу (FIFA) на чале з Джаньніі Інфантына, у тым ліку, чэмпіянаты сьвету, калі не адмовяцца ад плянаў прадаць частку правоў на першынства прыватным інвэстарам і брату зяця Дональда Трампа, у прыватнасьці.
Як адзначаецца ў заяве UEFA, апублікаванай на старонцы арганізацыі ў сацыяльнай сетцы Х, гэтае рашэньне падтрымалі ўсе 55 нацыянальных футбольных асацыяцыя Эўропы.
Пазьней супраць гэтай прапановы Інфантына выступіла і Concacaf — Канфэдэрацыя Паўночнай і Цэнтральнай Амэрыкі і Карыбскіх астравоў, але зрабіла гэта ў больш мяккіх фармуляваньнях.
Калі справа сапраўды дойдзе да байкоту, то, згодна з ухваленым рашэньнем, эўрапейскія зборныя будуць байкатаваць і мужчынскі, і жаночы чэмпіянаты сьвету, а таксама клюбны чэмпіянат сьвету.
На гэтым тыдні FIFA на чале з Інфантына абнародавала плян прыцягненьня прыватных інвэстараў да фінансаваньня турніраў усіх узроўняў і накіравала ўсім 211 нацыянальным футбольным фэдэрацыям ліст, у якім патрабавала да 19 верасьня адрэагаваць на гэтую прапанову.
Як запэўніла FIFA, прыход інвэстараў забясьпечыць кожнай нацыянальнай фэдэрацыі дадатковае фінансаваньне ў 40 мільёнаў даляраў.
Крытыкі гэтых плянаў абвінавачваюць Інфантына ў спробе ўзбагаціць сябе і сваіх набліжаных, і даць зарабіць сваім уплывовым сябрам.
Мяркуецца, што прыцягненьнем інвэстараў у новай схеме будзе займацца інвэстыцыйная фірма Thrive Capital, заснаваная Джошуа Кушнэрам, родным братам зяця прэзыдэнта ЗША Дональда Трампа Джарэда Кушнэра.
Форум