Пра станоўчае галасаваньне за праект паведамляе прэс-служба Саэймы.
Зьмяненьні прадугледжваюць забарону на імпарт зь Беларусі і Расеі шэрагу прамысловых тавараў — кніг, газэт, відэагульняў, спартовых тавараў, цацак, адзеньня і абутку. Канчатковы пералік зацьвердзіць Кабінэт міністраў.
Кіраўнік камісіі Саэймы ў абароне, унутраных справах і процідзеі хабарніцтву Раймандс Бэргманіс назваў рашэньне дэпутатаў працягам палітыкі «мэтанакіраванага разрыву эканамічных сувязяў з Расеяй і Беларусьсю» пры захаваньні «непахіснай падтрымкі Ўкраіны ў яе змаганьні за свабоду і незалежнасьць».
Адзначаецца, што забаронена імпартаваць згаданыя тавары з іншых краін, калі прадукцыя вырабленая ў Беларусі або Расеі.
«Новае рэгуляваньне ахоплівае асобныя групы тавараў, якія могуць выкарыстоўвацца для распаўсюду прапаганды і дэзынфармацыі, — адзначыла прэс-служба Саэймы.
Згодна з новым законам, Кабінэт міністраў да 1 сакавіка і надалей штогод будзе ацэньваць уплыў забароны на імпарт на бясьпеку латвійскага грамадзтва і грамадзкія інтарэсы. Дэпутатам будуць даваць справаздачу.
Забарона на імпарт, якая ўводзіцца законам, будзе дзейнічаць да 1 ліпеня 2027 году.
Цяпер дакумэнт мае падпісаць прэзыдэнт Латвіі. Закон набудзе моц на наступны дзень пасьля афіцыйнага апублікаваньня.
Санкцыі Латвіі супраць Беларусі
Афіцыйная Рыга мае шэраг абмеаваньняў у дачыненьні эканомікі і палітыкі Беларусі. Частка зь іх прынятая ў межах палітыкі Эўрапейскага зьвязу, а частка — непасрэдна самой Латвіяй.
У прыватнасьці, супраць беларусаў латышы ўвялі асобныя абмежаваньні ў спорце. Раней праз гэта Латвія зь Літвою адмовіліся прымаць зборную Беларусі ў міні-футболе, праз што УЭФА давялося пераносіць частку турніру ў Славенію.
Таксама вядома, што Латвія стварыла ўласны сьпіс фізычных і юрыдычных асобаў, якія спрыяюць расейскай агрэсіі супраць Украіны.
Асобную занепакоенасьць афіцыйнай Рыгі выклікае міграцыйны ціск з боку Беларусі. Улады Латвіі неаднаразова заяўлялі, што рэжым Лукашэнкі спрабуе з дапамогаю мігрантаў з азіяцкіх і афрыканскіх краінаў ціснуць на Эўразьвяз і ўлады Латвіі ў прыватнасьці.
Генэральная пракуратура Латвіі 15 ліпеня завяла крымінальную справу супраць службовых асобаў Памежнага камітэту Беларусі.
«Расьсьледаваньнем крымінальнай справы будзе займацца Дэпартамэнт аховы дзяржаўнай бясьпекі Генэральнай пракуратуры», — гаворыцца ў заяве пракуратуры Латвіі.
Справу завялі на падставе заявы Дзяржаўнай памежнай службы Латвіі, пададзенай 13 ліпеня.
Форум