Пачаўся збор грошай на разьвітаньне са Сьвятланай Курс

Сям’я памерлай пісьменьніцы Сьвятланы Курс хоча годна разьвітацца з чалавекам, які ўсё сваё жыцьцё прысьвяціў беларускай мове, літаратуры і журналістыцы, — тлумачыць мэту збору фонд BySol.

У плянах правесьці публічную цырымонію разьвітаньня ў Варшаве. Дакладныя месца і час сям’я асобна паведаміць пазьней. Пасьля гэтага цела Сьвятланы плянуюць перавезьці ў Беларусь, аформіць усе патрэбныя дакумэнты і пахаваць яе на радзіме.

Каб зрабіць гэта магчымым, сям’я ўжо была вымушаная ўзяць крэдыт, гавораць арганізатары збору. Менавіта на пагашэньне гэтага крэдыту просяць дапамагчы беларусаў сьвету.

Сума збора складае €6000. Зь іх:

• €2000 — арганізацыя публічнай цырымоніі развітання са Святланай ў Варшаве
• €2200 — рэпатрыяцыя цела з Польшчы ў Беларусь
• €800 — афармленне неабходных дакументаў і консульскіх дазволаў
• €1000 — арганізацыя пахавання ў Беларусі

ГЛЯДЗІЦЕ ТАКСАМА:

«Зь ёй абсалютна незаўважна ляцеў час». Беларусы ўспамінаюць Сьвятлану Курс і Еву Вежнавец

Сьмерць Сьвятланы Курс

Пра сьмерць адной з найвядомейшых беларускіх пісьменьніц сучаснасьці стала вядома ад сям’і. Пазьней стала вядома, што яна памерла 19 ліпеня.

Сьвятлана Курс паходзіла зь Любаншчыны. Яна даўно жыла ў Польшчы.

У першым нумары часопісу «Аrche» ў 1998 годзе было апублікавана яе першае апавяданьне «Мы два Хохлікі». У 2008 годзе ў Кнігарні Нашай Нівы выйшаў зборнік апавяданьняў «Шлях дробнай сволачы». У 2015 годзе ў «Нашай Ніве» яна апублікавала сваё апавяданьне «Параска і яе чорны бык», не пад псэўданімам, а пад сапраўдным прозьвішчам.

У 2020-м яна пад псэўданімам Ева Вежнавец напісала кнігу «Па што ідзеш, воўча?» (выдавецтва «Пфляўмбаўм»/Выдавец Раман Цымбераў). Твор пераклалі на некалькі моваў сьвету, а кніга стала адной з найбольш прадаваных у беларускіх кнігарнях. У 2021-м годзе за кнігу яна атрымала прэмію Ежы Гедройца.

У канцы чэрвеня кнігу Сьвятланы Курс (Ева Вежнавец) «Па што ідзеш, воўча?» у перакладзе Малгажаты Бухалік на польскую ўключылі ў доўгі сьпіс польскай прэміі Angelus. А ў пачатку ліпеня яна на сваёй старонцы ў фэйсбуку прасіла прывезьці ёй адну кнігу зь Беларусі. Празь некалькі дзён яе ня стала.

Летась стала вядома, што ў Курс дактары знайшлі рак яечніка ў позьняй стадыі.

У траўні беларусы сьвету за адзін дзень сабралі для пісьменьніцы 12 тысяч эўра на лячэньне замест 10 тысяч, якія прасілі на зборы.

ГЛЯДЗІЦЕ ТАКСАМА:

Сьвятлана Курс на Свабодзе — пра творчасьць, беларусак, Расею, сьмерць і радасьць жыцьця