Беларускі «Альфа Банк» перастаў прымаць дэпазыты «Альфа Ўклад» у расейскіх рублях (адзыўны) на тэрміны 18 і 36 месяцаў.
Банк «БелВЭБ» і «Беларусбанк» увялі камісію за прыём наяўных расейскіх рублёў на бягучы (разьліковы) банкаўскі рахунак — 15% ад сумы залічэньня, паведаміла ў падборцы банкаўскіх навінаў агенцтва «Позірк».
Акрамя таго, стала вядома, што «Белгазпрамбанк» і «Сбер Банк» устанавілі ліміты на папаўненьне картак фізычных асоб у тэрмінальным абсталяваньні РУП «Белпошта».
У прыватнасьці, для нерэзідэнтаў у рамках прадукту «Разьліковыя карткі» «Белгазпрамбанк» паставіў абмежаваньне ў памеры 500 тыс. расейскіх рублёў за месяц.
Папярэднія абмежаваньні з расейскімі рублямі
У чэрвені і ліпені шэраг беларускіх банкаў спачатку ставіў, а затым узмацняў ліміты на прыём расейскіх рублёў у гатоўцы.
У ліпені беларускі «СберБанк» увёў ліміт на папаўненьне гатоўкай бягучых і разьліковых банкаўскіх рахункаў фізычных асобаў-нерэзыдэнтаў у расейскіх рублях. Цяпер гэтая апэрацыя ўжо мае 15% ад сумы папаўненьня. Да ліпеня стаўка складала 5%.
Асноўная прычына, чаму беларускія банкі так моцна падвысілі стаўкі, — лішак расейскіх рублёў у гатоўцы і высокія выдаткі на іх захоўваньне і перавозку.
Падобныя камісіі ўвялі і іншыя беларускія банкі. Памер стаўкі вагаецца ад 5% да 15%.
З 14 ліпеня такую аплату ўвёў «Альфа Банк». Вынятак зрабілі пры прыёме грошай ад кліентаў, якіх абслугоўваюць у банку ў межах зарплатнага праекту. Ня будуць спаганяць платы пры прыёме расейскіх рублёў для пераказу на рахунак па ўліку ўкладу (дэпазыту), адкрытага ў банку, у час аднаго апэрацыйнага дня.
Банк ВТБ-Беларусь з 10 жніўня ў тры разы павысіць камісію за папаўненьне гатоўкай рахункаў фізычных асобаў-нерэзыдэнтаў у расейскіх рублях. Памер стаўкі складзе 15%.
Такую самую стаўку ўвялі ў сваіх апэрацыях і іншыя банкі — Тэхнабанк і МТбанк. Адсотак бярэцца ад сумы залічэньня.
Чаму гэта адбываецца?
У першай палове 2026 годзе расейскія грамадзяне і расейскі бізнэс кінуліся здымаць грошы з банкаў. Аб’ём гатоўкі ў абарачэньні павялічыўся на 17,2 мільярда даляраў — гэта другі па велічыні паказьнік пасьля пандэмічнага 2020 году, калі рост склаў 18,6 мільярда даляраў.
Інфраструктура лічбавых плацяжоў у Расеі дае збоі, а кантроль за банкаўскімі апэрацыямі моцна ўзмацніўся. Акрамя таго, банкаўскія дэпазыты сталі менш прывабнымі — цэнтральны банк РФ пачаў зьмякчаць грашова-крэдытную палітыку, сярэдняя максымальная працэнтная стаўка па рублёвых дэпазытах у дзесяці найбуйнейшых банках зьнізілася з 15% у студзені да 12,97% у пачатку чэрвеня. Такім чынам, зьнік яшчэ адзін стымул захоўваць грошы ў банку, і некаторыя ўкладнікі перайшлі на ашчаджэньні ў гатоўцы.
Расея працягвае вайну ва Ўкраіне і нават афіцыйныя СМІ пацьвярджаюць, што эканоміка краіны хістаецца праз адчувальныя праблемы.
Паводле зьвестак цэнтральнага банку, аб’ём гатоўкі, якая захоўваецца па-за банкамі, вырас на 17,5% у параўнаньні з аналягічным пэрыядам мінулага году і перавысіў 19 трыльёнаў рублёў (243,14 мільярда далараў ЗША) з пачатку году, пісала агенцтва Reuters.
Гэта стала ціскам на банкаўскую сыстэму, якая абапіраецца на дэпазыты для фінансаваньня. Дэфіцыт ліквіднасьці, які павялічваўся, у чэрвені дасягнуў 2 трыльёнаў рублёў, паказалі зьвесткі.
Форум