Час сыходу Крыстафэра Сьміта з пасады адпавядае пэрыяду стандартных ратацыяў кадраў у Дзяржаўным дэпартамэнце ЗША.
Гэтую інфармацыю таксама пацьвердзілі крыніцы выданьня «Люстэрка».
Крыстафэр Сьміт дыплямат адказвае ў Дзяржаўным дэпартамэнце за беларускі кірунак. Ён некалькі разоў прылятаў у Менск для перамоваў з Аляксандрам Лукашэнкам і ўдзельнічаў у вызваленьні палітычных зьняволеных.
Паводле інфармацыі адной з крыніцаў «Люстэрка», дыплямат працягне сваю прафэсійную кар'еру ў Малдове, але, імаверна, не ў структурах Дзяржаўнага дэпартамэнту.
Свабода накіравала ліст Крыстафэру Сьміту з просьбай аб пацьверджаньні гэтай інфармацыі, але на момант публікацыі гэтага матэрыялу адказу не атрымала.
Чаму гэта важна
З актывізацыяй дыялёгу паміж Вашынгтонам і Менскам у 2025 годзе Крыстафэр Сьміт стаў адным з галоўных перамоўнікаў паміж урадам Злучаных Штатаў і рэжымам Лукашэнкі. У лютым 2025-га ён удзельнічаў у апэрацыі вывазу зь Беларусі двух палітвязьняў і аднаго грамадзяніна ЗША. Дыплямат быў у складзе групы, якая прылятала ў Менск і сустракалася з Лукашэнкам і кіраўніком КДБ Іванам Тэртэлем. Камэнтуючы гэтае вызваленьне, Сьміт заяўляў, што гэта «быў аднабаковы жэст з боку ўладаў Лукашэнкі» і той «нічога не атрымаў за гэты абмен».
Сам Лукашэнка таксама публічна ўзгадваў амэрыканскага дыплямата. У сакавіку 2026 году, кажучы аб перамовах з ЗША, ён адзначыў, што «галоўную ролю адыгрываў і цяпер, напэўна, адыгрывае Сьміт».
У Офісе Святланы Ціханоўскай называлі Крыстафэра Сьміта «самым пасьлядоўным партнэрам у ЗША». З словаў дарадцы Ціханоўскай Дзяніса Кучынскага, у 2024—2025 гадах яны мелі восем асабістых сустрэчаў з амэрыканскім дыпляматам у Вільні і Вашынгтоне.
Форум