«Водазабесьпячэньне гораду часова спынілі. Тэрмінова сабралі камісію надзвычайных сытуацыяў», — паведаміла рэгіянальнае выданьне «Гомельская праўда».
Улады паведамілі, што жыхары могуць атрымаць пітную ваду ў чатырох месцах горада:
- каля крамы «Три желания» па вуліцы Шашовая, 109;
- каля гандлёвага цэнтру ў мікрараёне 16;
- у 2-м мікрараёне каля невялікай крамы «Еўраопт»;
- каля крамы «Суседзі» на вуліцы Казлова.
Паводле ўладаў, арганізавалі таксама дастаўку тэхнічнай і пітной вады ўстановам сацыяльнай сфэры. Аварыйныя брыгады спрабуюць аднавіць цэнтралізаванае водазабесьпячэньне.
Пазьней Міністэрства надзвычайных сытуацыяў паведаміла, што без вады засталіся яшчэ тры бліжэйшыя да Жлобіна вёскі — Саланое, Акцябр і Грабск.
Ратаўнікі прыехалі на месца аварыі, адпампавалі ваду на водазаборы і дапамаглі забясьпечыць тэхнічнай вадой цэнтральную раённую лякарню.
А 12-й гадзіне дня намесьнік старшыні Жлобінскага райвыканкама Сяргей Андрусеў паведаміў, што водазабесьпячэньне ў горадзе адноўленае, аднак рамонтныя працы працягваюцца, таму магчымае часовае пагаршэньне якасьці вады, паніжаны ціск у сетках і слабы напор.
Што папярэднічала і чаму гэта важна
Апошнім часам у Беларусі ўсё часьцей здараюцца праблемы з забесьпячэньнем вадою, хоць тарыфы на камунальныя паслугі растуць.
З пачатку году адбылося некалькі вялікіх аварыяў ці надзвычайных сытуацыяў:
- у студзені Клецак двойчы за два дні быў без вады: прарвала трубы, пракладзеныя ў 1974 годзе;
- у Гомлі таксама ў студзені праз аварыю 90 прыватных дамоў былі без вады;
- у красавіку ў Рагачове некалькі дзён з кранаў цякла вада з пахам хімічных рэчываў;
- у Менску пэрыядычна ўзьнікаюць праблемы зь якасьцю вады;
- у чэрвені Салігорск праз аварыю застаўся без вады
У той жа час вядома, што больш за 500 000 жыхароў Беларусі ўвогуле ня маюць доступу да цэнтралізаванага забесьпячэньня вадой.
Паводле ўладаў, за апошнія пяць гадоў у Беларусі адкрылі каля 100 сьвідравінаў, пабудавалі больш за 1000 станцыяў абезжалезваньня вады і праклалі 250 км новых водаправодных сетак. Агулам для паляпшэньня якасьці вады ў краіне ажыцьцявілі больш за 1000 розных праектаў.
Форум