У Корпусе вартавых ісламскай рэвалюцыі Ірану (КВІР) заявілі, што ў адказ на апошнія ваенныя ўдары ЗША па Іране атакавалі амэрыканскія вайсковыя аб’екты ў Бахрэйне і Кувэйце.
Як паведаміла Радыё Свабодная Эўропа / Радыё Свабода, у абедзьвюх краінах прагучалі сырэны паветранай трывогі, бо Кувэйт заявіў, што яго сыстэмы супрацьпаветранай абароны рэагуюць на пагрозы варожых ракет і бесьпілётнікаў. Міністэрства ўнутраных спраў Бахрэйна заклікала жыхароў перайсьці ў сховішчы пасьля таго, як былі ўключаныя сырэны папярэджаньня.
Гэтаму папярэднічалі новыя ўдары ЗША па Іране пасьля таго, як сілы Тэгерану напалі на камэрцыйныя караблі ў Армускай пратоцы. Перад гэтым Злучаныя Штаты адклікалі скасаваньне санкцый супраць іранскай нафты.
Новыя абстрэлы Ірану і ЗША выклікалі новы сурʼёзны крызіс пасьля падпісаньня ў мінулым месяцы 60-дзённага мэмарандуму аб узаемаразуменьні, накіраваны на спыненьне ваенных дзеяньняў і аднаўленьне аднаго з найважнейшых марскіх маршрутаў у сьвеце.
Амэрыканскія вайскоўцы заявілі, што ўдары былі прамым адказам на іранскія напады на тры камэрцыйныя судны, якія праходзілі праз Армускую пратоку, у тым ліку на катарскі танкер для звадкаванага прыроднага газу.
У Цэнтральным камандаваньні ЗША (CENTCOM) назвалі дзеяньні Ірану «неабгрунтаванымі, небясьпечнымі і відавочным парушэньнем рэжыму спыненьня агню».
Іранскія СМІ паведамілі пра некалькі выбухаў на поўдні Ірану, у тым ліку на востраве Кешм, у горадзе Сірык і каля стратэгічнага порту Бандар-Абас. Амэрыканскія чыноўнікі не адразу ўдакладнілі, якія мэты былі зьнішчаныя.
Ваенныя дзеяньні адбыліся ў той час, калі прэзыдэнт ЗША Дональд Трамп прысутнічаў на саміце NATO у Анкары, дзе ён павінен быў сустрэцца з іншымі лідэрамі краін арганізацыі для абмеркаваньня крызісу ў Іране, выдаткі на абарону і прыярытэты бясьпекі альянсу.
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
8 красавіка ўступіла ў сілу замірэньне, але ў рэгіёне Пэрсыдзкай затокі працягваюцца спарадычныя выпадкі гвалту, у тым ліку напады на караблі з боку тэгеранскіх сілаў, як і ўдары ЗША па Іране. Пазьней замірэньне некалькі разоў працягвалі, але штораз парушалі. Адносны спакой наступіў у чэрвені 2026 году, але 25 чэрвеня іранскія сілы атакавалі некалькі караблёў у Армускай пратоцы, якія эвакуавалі зь небясьпечнай зоны.
Форум