Нацыянальная пракуратура Польшчы апублікавала больш інфармацыі пра затрыманых Агенцтвам унутранай бясьпекі беларуса і паляка, якія здымалі на відэа акцыі беларусаў у Варшаве.
Затрыманага грамадзяніна Беларусі завуць Аляксей Б., а грамадзяніна Польшчы — Рафал Г. Беларусу 19 гадоў, у Польшчы ён знаходзіцца легальна, працаваў у Варшаве афіцыянтам.
Затрыманым выставілі абвінавачаньні ў дзеяньнях у інтарэсах замежнай выведкі ў 2024–2025 гадах у Варшаве і іншых месцах краіны.
Прэс-сакратар міністра-каардынатара спэцслужбаў Яцэк Дабжынскі канкрэтызаваў у камэнтары тэлеканалу TVPinfo, чым менавіта займаліся затрыманыя.
«Як мінімум зь мінулай восені яны езьдзілі тут, у Варшаве, на розныя мерапрыемствы беларускай меншасьці, на пратэсты, фэстывалі. Там, падкрэсьліваю, на ўказаньне беларускіх спэцслужбаў яны фатаграфавалі ўдзельнікаў, здымалі відэа і перасылалі іх праз усходнюю мяжу, каб беларускія спэцслужбы, службы Лукашэнкі, выкарыстоўвалі ў сваіх карысьлівых, і, вядома ж, у прапагандысцкіх мэтах».
Таксама прадстаўнік спэцслужбаў паведаміў, што суд ужо вынес пастанову, і 19‑гадовы беларус правядзе наступныя тры месяцы пад вартай.
Польскі грамадзянін, як паведамлялася, застаецца на волі, пад паліцэйскім наглядам, яму забаронены выезд з краіны, у яго забралі пашпарт. Больш пра яго нічога не гавораць.
Расьсьледаваньне пашыраецца, адзін з арыштаваных памёр
Паводле інфармацыі Нацыянальнай пракуратуры, справа не замыкаецца на дзьвюх асобах — у межах расьсьледавання ўжо затрымалі пяць чалавек, у тым у ліку траіх грамадзян Беларусі і дваіх — Украіны.
Трое падазраваных знаходзяцца пад вартай зь лістапада 2025 году, адзін зьмешчаны ў цэнтар утрыманьня непаўналетніх, адзін з падазраваных памёр.
Дзейнасьць падазраваных каардынавалася праз Telegram. Аплату яны атрымлівалі ў крыптавалюце.
Акрамя здыманьня мерапрыемстваў беларусаў, падазраваныя таксама здымалі аб’екты «крытычнай інфраструктуры і іншых месцаў, якія маюць вырашальнае значэньне для бясьпекі дзяржавы і яе грамадзян». Таксама заданьні ўключалі маляваньне графіці і распаўсюд плякатаў.
Што вядома пра папярэднія затрыманьні?
25–26 лістапада 2025 году ў Варшаве і Беластоку былі затрыманыя пяць падазраваных: грамадзяне Ўкраіны Аляксандар С. і непаўналетняя Сафія Ч., а таксама грамадзяне Беларусі Вікторыя М., Антон М. і Ўладзімер У.
Паводле агенцтва, падазраваных завэрбавалі праз мэсэнджар Telegram, яны фатаграфавалі аб’екты і атрымлівалі інфармацыю аб крытычна важнай інфраструктуры, сыстэмах і аб’ектах, «якія маюць вырашальнае значэнне для бясьпекі Рэспублікі Польшча і яе грамадзян», а таксама разьмяшчалі плякаты і стваралі графіці.
Подкуп дэманстрантаў
Сярод шэрагу шпіёнскіх скандалаў, якія страсянулі Польшчу апошнімі гадамі, ёсьць разбурэньне чыгуначных каляінаў, спробы перасыланьня асабістай інфармацыі ў Беларусь, перадача зьвестак пра польскія стратэгічныя і вайсковыя аб'екты. А нядаўна зьявіўся і подкуп дэманстрантаў з мэтай маніпуляцыі грамадзкай думкай.
У канцы чэрвеня 2026 году стала вядома, што ў Варшаве, Кракаве, Быдгашчы, Закапаным і Ўроцлаве затрымалі двух грамадзян Беларусі і дзевяцярых — Украіны, каб неадкладна выслаць іх з Польшчы.
Яны зь мінулай восені вэрбавалі за атрыманыя з Расеі грошы людзей для ўдзелу ў дэманстрацыях, арганізаваных між украінскіх уцекачоў у Польшчы. Гэтак Расея імкнулася займець уплыў на ўкраінскіх уцекачоў, каб выкарыстоўваць іх для папулярызацыі палітычных лёзунгаў, сьцьвярджае Агенцтва ўнутранай бясьпекі Польшчы.
Форум