1388 — Вітаўт выдаў прывілей габрэям.
1404 — Смаленск вярнуўся ў склад Вялікага Княства Літоўскага.
1812 — войскі Напалеона Банапарта перайшлі Нёман каля Коўна, пачалася расейска-француская вайна 1812 году.
1925 — заснаваная Беларуская сялянска-работніцкая грамада.
1934 — сталіца Ўкраіны перанесеная з Харкава ў Кіеў.
1941 — войскі нацысцкай Нямеччыны занялі Горадню.
1941 — пачалося першае і самае моцнае бамбаваньне Менску нацысцкай авіяцыяй, якое доўжылася некалькі дзён.
1945 — парад Перамогі ў Маскве. Парад прымаў маршал Георгій Жукаў. Камандаваў парадам маршал Канстанцін Ракасоўскі.
1948 — СССР перакрыў дарогі з Бэрліну на захад і ўвёў блякаду Заходняга Бэрліну (доўжылася да 12 траўня 1949 году).
1963 — у студыі BBC у Лёндане ўпершыню прадэманстравалі побытавы відэамагнітафон.
1964 — у Цімкавічах адкрыўся мэмарыяльны літаратурны музэй Кузьмы Чорнага.
1989 — у Вільні пачаўся Ўстаноўчы зьезд Беларускага народнага фронту «Адраджэньне».
Устаноўчы зьезд БНФ, на якім прысутнічала каля 400 дэлегатаў, адбыўся 24–25 чэрвеня 1989 году ў Вільні, бо правесьці яго ў Менску не дазволіў Прэзыдыюм Вярхоўнага Савету БССР.
Зьезд абраў Сойм, ухваліў Статут, праграму і пастановы аб кірунках і спосабах дзейнасьці: «Аб палітычным плюралізьме», «Аб беларускай нацыянальнай сымболіцы», «Аб дзяржаўнасьці беларускай мовы», «Аб пераадоленьні наступстваў Чарнобыльскай катастрофы» і «Аб праекце Канстытуцыі БССР».
На пасаду старшыні Сойму БНФ абсалютнай бальшынёй галасоў быў абраны Зянон Пазьняк. Яго намесьнікамі сталі Юрась Хадыка і Міхась Ткачоў.
У гэты дзень нарадзіліся
1767 — Стэфан Грабоўскі, вайсковы дзеяч, адзін з кіраўнікоў вызвольнага паўстаньня 1794 г.
1777 — Ян Ходзька, пісьменьнік, публіцыст, грамадзкі дзеяч.
1796 — Ян Чачот, беларускі і польскі паэт і фальклярыст. У 1818 годзе стаў сябрам тайнага таварыства філяматаў. Пасьля выкрыцьця царскімі ўладамі віленскіх студэнцкіх згуртаваньняў у 1823 годзе зьняволены ў Віленскай турме, потым сасланы на Ўрал. Толькі праз 10 гадоў паэту дазволілі вярнуцца ў Беларусь.
1838 — Ян Матэйка, мастак.
1880 — Іван Краскоўскі, дзеяч беларускага і ўкраінскага нацыянальных рухаў. Адзін зь першапраходцаў беларускага футболу, заснавальнік беларускіх камандаў пры навучальных установах Вільні і Дзьвінску.
1900 — Кузьма Чорны (Мікалай Раманоўскі), клясык беларускай літаратуры. Літаратуразнаўцы называюць Чорнага стваральнікам беларускага сацыяльна-псыхалягічнага раману.
1949 — Уладзімер Тоўсьцік, жывапісец, народны мастак Беларусі.
1968 — Барыс Гельфанд, шахматыст, міжнародны гросмайстар.
У памяці
1744 — Багуслаў Корвін-Гасеўскі, рэлігійны дзяяч ВКЛ, біскуп беларускі і смаленскі.
1834 — Людвік Тадэвуш Замбжыцкі, адзін з кіраўнікоў паўстаньня 1830–1831 гг.
1863 — падчас нацыянальна-вызвольнага паўстаньня за прачытаньне маніфэсту ў мястэчку Ішчална расейскія карнікі расстралялі ў Лідзе ксяндза Адама Фалькоўскага.
1976 — Аскар Марыкс, мастак, заснавальнік беларускай сцэнаграфіі, народны мастак Беларусі.
