«Ён карыстаецца грузінскім пашпартам. Службы працуюць, каб вызначыць злачынца», — напісаў Дональд Туск на сваёй старонцы на плятформе Х.
Паводле яго, падазраванага затрымалі люблінская паліцыя і Агенцтва ўнутранай бясьпекі.
Польская паліцыя ўдакладніла, што падазраванага затрымалі раніцай 18 чэрвеня каля Варшавы. Згодна з інфармацыяй паліцыі, затрыманы карыстаецца пашпартам, выдадзеным у Расеі.
Люблінская паліцыя апублікавала фота зь месца затрыманьня і паведаміла, што падазраваны «карыстаецца пашпартам, выдадзеным 36-гадоваму грамадзяніну Грузіі».
Паводле міністра ўнутраных спраў Польшчы Марціна Кервіньскага, затрыманы падазраецца і ў іншых злачынствах, учыненых раней.
Ён таксама адзначыў, што затрыманых у дзень забойства беларусаў адпусьцілі, бо яны хоць і былі на месцы здарэньня, але непасрэднага дачыненьня да яго ня мелі.
Затрыманьне праводзілі сьледчыя ў крымінальных справах з Галоўнага ўпраўленьня паліцыі ў Любліне ў складзе спэцыяльнай сьледчай групы, а таксама супрацоўнікаў атрадаў спэцыяльнага прызначэньня і Агенцтва ўнутранай бясьпекі.
Што папярэднічала
Аб забойстве ў Белай Падляскай расейскага мастака-пэрформэра Сямёна Скрапецкага стала вядома ў панядзелак 15 чэрвеня. Здарэньне адбылося раніцай на адным з скрыжаваньняў гораду, дзе Скрапецкі жыў пасьля ад’езду з Расеі ў 2021 годзе.
У той жа дзень зьявілася інфармацыя аб магчымай датычнасьці да забойства грамадзян Беларусі. У аўторак 16 чэрвеня польскія ўлады пацьвердзілі, што ў выніку сьледчых дзеяньняў па гарачых сьлядах затрымалі трох чалавек, двое зь якіх — грамадзяне Беларусі. Пазьней іх вызвалілі.
Раніцай 17 чэрвеня каардынатар польскіх спэцслужбаў Томаш Семоняк у размове з парталам Interia расказаў, што на гэты момант асноўная вэрсія расьсьледаваньня забойства Скрапецкага — дзеяньні расейскіх спэцслужбаў.
Форум