Прадстаўнікі дэмакратычных сілаў Беларусі прыехалі ў Кіеў цягніком.
«Першае, што я зрабіла, калі прыехала ў Кіеў, — адразу зь цягніка наведала магілу Марыі Зайцавай. Яна сымбалізуе ня толькі наш супраціў дыктатуры, але і ўкраінска-беларускую салідарнасьць. Для мяне было вельмі важна пачаць гэты візыт менавіта з ушанаваньня чалавека, які аддаў жыцьцё за свабоду Ўкраіны і Беларусі», — паведаміла Сьвятлана Ціханоўская ў сваім Telegram-канале.
Сьвятлана Ціханоўская разам зь сябрамі сваёй каманды — Паўлам Латушкам і Валерам Мацкевічам — усклалі кветкі на магілу Марыі Зайцавай.
У другой палавіне дня дэлегацыя дэмакратычных сіл Беларусі наведала Чарнобыльскую АЭС і Прыпяць.
«Пабачыць на ўласныя вочы Чарнобыльскую АЭС і Прыпяць — вельмі цяжкі і эмацыйны досьвед. Пустыя вуліцах Прыпяці, пакінутыя дамы, школы, дзіцячыя цацкі — усё гэта ціхі напамін аб тым, як хутка можа абарвацца звычайнае спакойнае жыцьцё. Як адна катастрофа можа пакінуць рану на дзесяцігодзьдзі», — адзначыла Сьвятлана Ціханоўская.
Паводле яе, у Прыпяці і Чарнобылі асабліва востра адчуваецца, як важна абараняць мір, свабоду і чалавечае жыцьцё, і як небясьпечна, калі ўлада знаходзіцца ў руках людзей, для якіх няма ні межаў, ні маралі, ні адказнасьці.
«Сёньня, калі Расея вядзе вайну супраць Украіны і выкарыстоўвае ядзерны шантаж як інструмэнт ціску, памяць пра Чарнобыль зноў нагадвае нам, наколькі небясьпечнымі могуць быць хлусьня, маўчаньне і абыякавасьць да лёсу людзей. Беларусы ведаюць цану такой катастрофы, і нашая краіна не павінна быць часткай ядзерных пагроз ці агрэсіі», — заявіла Сьвятлана Ціханоўская.
Ушанаваньне палеглых беларусаў
У Кіеве Сьвятлана Ціханоўская і міністар замежных спраў Украіны Андрэй Сыбіга ўшанавалі памяць загінулых герояў, у тым ліку беларускіх добраахвотнікаў, каля Сьцяны памяці.
«Мы схіляем галовы перад кожным, хто стаў на абарону сваёй краіны, свайго народа і агульных каштоўнасьцяў свабоды і годнасьці. Больш за 80 беларусаў ужо загінулі ў гэтай вайне. Мы памятаем кожнага. Іх імёнамі будуць названыя вуліцы ў вольнай Беларусі. Яны абараняюць ня толькі Украіну — яны абараняюць гонар беларускага народа і змагаюцца за нашу агульную свабоду.
Мы таксама памятаем пра тых, хто сёньня знаходзіцца ў расейскім палоне. Пра тых вэтэранаў і добраахвотнікаў, якія страцілі здароўе, прайшлі праз раненьні і выпрабаваньні. І наш абавязак — падтрымліваць іх і іхныя сем’і.
Украіна сёньня — прыклад мужнасьці, стойкасьці і годнасьці для ўсяго рэгіёну. І я хачу падзякаваць міністру Андрэю Сыбігу і ўкраінскай дыпляматыі за прынцыповасьць, рашучасьць і вернасьць сваёй краіне».
Літаральна напярэдадні візыту Ціханоўскай ва Ўкраіну стала вядома пра тое, што бязь вестак прапаў яшчэ адзін беларус, які ваяваў за волю Ўкраіны Ціхан Клюкач.
Перамовы ў МЗС Украіны
Дэлегацыя беларускіх дэмакратычных сілаў у Кіеве 25 траўня таксама правяла двухбаковую сустрэчу з міністрам замежных справаў Украіны Андрэем Сыбігам.
Пасьля двухбаковай сустрэчы Сьвятлана Ціханоўская і міністар замежных справаў Украіны Андрэй Сыбіга правялі супольную прэс-канфэрэнцыю.
Сьвятлана Ціханоўская падзякавала Ўкраіне, прэзыдэнту Ўладзіміру Зяленскаму і міністру Андрэю Сыбігу за запрашэньне і падкрэсьліла салідарнасьць беларусаў з украінскім народам. Асобна Ціханоўская заявіла: рэжым Лукашэнкі зрабіў Беларусь саўдзельніцай агрэсіі, але ён не прадстаўляе беларускі народ.
«Гэта мой першы рабочы візыт ва Ўкраіну, і я тут, каб падкрэсьліць: беларускі народ падтрымлівае незалежнасьць, сувэрэнітэт і тэрытарыяльную цэласнасьць Украіны. Рэжым зрабіў Беларусь саўдзельніцай гэтай агрэсіі. Але Лукашэнка — узурпатар, які не прадстаўляе беларусаў і служыць выключна інтарэсам Крамля. І Беларусь — не Расея, і беларусы ня роўныя рэжыму. Беларусы стаялі з вамі на Майдане, гінулі ў акопах яшчэ з 2014 года. Тысячы беларусаў выступілі супраць вайны, і сотні застаюцца за кратамі за падтрымку Украіны».
Ціханоўская паведаміла, што на перамовах у МЗС Украіны бакі абмеркавалі далейшае супрацоўніцтва паміж Украінай і дэмакратычнымі сіламі Беларусі, і вельмі важна, каб Украіна бачыла ў свабоднай Беларусі будучага партнэра і суседа, а не пагрозу:
«Нам патрэбна больш узаемнага даверу, больш кантактаў паміж людзьмі, экспэртамі, грамадзянскай супольнасьцю і дэмакратычнымі інстытутамі. Пуцін і Лукашэнка зрабілі ўсё, каб разбурыць дружныя адносіны паміж нашымі народамі, але мы іх абавязкова адновім. Нашыя народы заслугоўваюць мірнай, эўрапейскай і дэмакратычнай будучыні. І мы павінны трымацца разам, каб яна стала рэальнасьцю».
Што папярэднічала
Пра падрыхтоўку візыту Ціханоўскай ва Ўкраіну загаварылі пасьля яе сустрэчы з Уладзімірам Зяленскім 25 студзеня ў Вільні. Тады прэзыдэнт Украіны запрасіў яе ў Кіеў. Была інфармацыя, што паездка можа адбыцца на Дзень волі, 25 сакавіка, аднак тады візыт перанесьлі.
Падрыхтоўка да візыту Ціханоўскай у Кіеў вядзецца з пачатку вясны. Вядома, што яна плянуе адкрыць у Кіеве Місію дэмакратычных сілаў Беларусі.
Раней у інтэрвію Свабодзе Сьвятлана Ціханоўская назвала свой візыт ва Ўкраіну «гістарычным» і падзякавала Ўкраіне за трансфармацыю яе стаўленьня да дэмакратычных сілаў Беларусі. Яна анансавала сустрэчы з кіраўніцтвам Украіны, сустрэчу з прадстаўнікамі беларускай дыяспары і наведваньне пахаваньняў беларускіх добраахвотнікаў, якія загінулі за Ўкраіну.
Форум