Раней улады Ўцянскага раёну абвясьцілі трывогу. Жыхароў адмысловым паведамленьнем заклікалі прайсьці ў сховішчы і сачыць за паведамленьнямі службаў.
«Зьнішчальнікі NATO ўжо падняліся ў паветра і гатовыя іх зьнішчыць. Прашу вас, атрымаўшы афіцыйнае папярэджаньне, прыняць меры засьцярогі і схавацца ў бясьпечным месцы», — напісаў Гітанас Наўседа ў сваім фэйсбуку.
Пасьля скасаваньня трывогі Ўзброеныя сілы Літвы паведамілі, што верталёт ВПС накіроўваўся да месца, дзе аб’ект зьнік з экранаў радараў.
Акрамя таго, Наўседа правёў тэрміновую нараду з прэзыдэнтамі Латвіі і Эстоніі.
Акрамя таго, 21 траўня паветраную трывогу трэці дзень запар абвясьцілі ў Латвіі. Узброеныя сілы краіны напісалі пра магчымую пагрозу пралёту бесьпілётнікаў у Лудзенскім, Краслаўскім і Рэжыцкім краях. 21 траўня ў краіну заляцеў як мінімум адзін бесьпілётнік. На ўсходзе Латвіі, побач зь мяжой Беларусі і Расеі, праз гэта спынілі рух цягнікоў.
МЗС Літвы заявіў, што расейскія вайскоўцы наўмысна перанакіроўваюць украінскія дроны ў краіны Балтыі з дапамогай сродкаў радыёэлектроннай барацьбы.
Папярэднія трывогі
Раніцай 20 траўня пад Рыгай (Латвія) праз пагрозу бесьпілётнікаў спынілі пасажырскі цягнік літоўскай кампаніі LTG Link, што накіроўваўся зь Вільні праз Рыгу да мяжы з Эстоніяй.
У Вільні празь бесьпілётнік, які, імаверна, заляцеў з тэрыторыі Беларусі, на гадзіну спынялі працу аэрапорту. Паветраную трывогу абвяшчалі ў пяці раёнах Літвы — Віленскім, Ігналінскім, Уцянскім, Сьвянцянскім і Езяроскім. Ува ўсіх раёнах людзям рэкамэндавалі зайсьці ў сховішчы.
Тады літоўскія ўлады сьлядоў бесьпілётнікаў не знайшлі.
Пасьледавала й рэакцыя Брусэлю. Кіраўніца Эўрапейскага зьвязу Урзуля фон дэр Ляен заявіла, што Расея і Беларусь «нясуць непасрэдную адказнасьць» за сэрыю ўварваньняў бесьпілётнікаў ва ўсходнія краіны ЭЗ пасьля папярэджаньня аб бесьпілётніках у Літве.
Форум