«Большасьць бесьпілётнікаў зьбілі, але адбылося пацэльваньне ў прамысловы аб’ект. Загараньне ліквідуюць спэцыяльныя службы. Пацярпелых няма», — паведаміў Міхаіл Яўраеў.
Паводле яго, праз атаку дронаў спынялі рух на выезьдзе зь Яраслаўлю ў бок Масквы, але раніцай яго ўжо аднавілі.
Украінскі маніторынгавы Telegram-канал Supernova+ паведаміў, што цэльлю ўдару была нафтапампавальная станцыя «Ярославль-3» і нафтаперапрацоўчы завод (НПЗ). Украінская служба Радыё Свабода нагадала, што Яраслаўскі НПЗ апошні раз атакавалі 13 траўня.
Украінскія вайскоўцы пакуль не камэнтавалі гэтую інфармацыю.
Чаму гэта важна
Нафтапампавальную станцыю «Ярославль-3» пабудавалі 44 гады таму. Яе стваралі як частку трубаправоду Сургут — Полацак, якім сыбірскую нафту транспартавалі ў Беларусь і далей на экспарт, у тым ліку ў Літву і Польшчу.
Станцыя і цяпер застаецца важным зьвяном нафтатранспартнай сыстэмы Расеі, а таксама выкарыстоўваецца для транспартаваньня нафты ў Полацак, дзе яна разьмяркоўваецца на беларускія НПЗ.
На тэрыторыі Беларусі гэты ўчастак абслугоўвае ААТ «Полацктранснафта Дружба».
Украіна сыстэматычна атакуе нафтавыя аб’екты ў Расеі пасьля пачатку поўнамаштабнай вайны.
Форум