На Чарнігаўшчыне непадалёк ад беларускай мяжы — лясны пажар, які не даюць тушыць расейскія дроны

Магчымая эвакуацыя людзей, паведаміў кіраўнік Чарнігаўскай абласной вайсковай адміністрацыі Вячаслаў Чавус.

«Пачасьціліся выпадкі выкарыстаньня тэрарыстамі FPV-дронаў з запальнай сумесьсю. Больш за тое — агрэсар не дазваляе тушыць агонь — там увесь час вісяць іхныя дроны», — напісаў Чавус у Тэлеграме.

За содні плошча пажару павялічылася амаль удвая. Вецер гоніць яго ў бок расейскай тэрыторыі.

Але зусім побач месьціцца і Беларусь. Ад Елінскага лясьніцтва, зь якога паведамляюць пра пажар, да беларускай мяжы — каля 20-30 кілямэтраў.

ГЛЯДЗІЦЕ ТАКСАМА:

Лясны пажар ахапіў 1100 гектараў украінскай часткі Чарнобыльскай зоны побач зь Беларусьсю

Яшчэ адзін пажар пры беларускай мяжы гарыць непадалёк ад Чарнобылю. Прычым некаторыя ягоныя ўчасткі ня тушаць, бо яны замінаваныя.

У беларускім Міністэрстве лясной гаспадаркі папярэджвалі пра магчымасьць загараньня сумежнага лесу на беларускай тэрыторыі. Але потым заявілі, што дзякуючы дажджу такая пагроза зьнікла.

ГЛЯДЗІЦЕ ТАКСАМА:

За дзень да параду 9 траўня дроны атакавалі Расею. 13 аэрапортаў спынілі працу