Як паведамляе Ўкраінская служба Радыё Свабода, празь вецер і засуху агонь у чарнобыльскай зоне адчужэньня імкліва пашыраецца. Пажар ужо ахапіў 1100 гектараў лесу. Ратаўнікі і пажарнікі працуюць ува ўзмоцненым рэжыме.
Але трапіць на некаторыя дзялянкі лесу немагчыма, бо яны замінаваныя, паведаміла Дзяржаўная служба назвычайных сытуацыяў Украіны:
«У некаторых лясных масівах працы часова не праводзяцца з прычыны пагрозы ад выбуховых прадметаў».
Ад МНС Беларусі інфармацыі пра пагрозу перакіданьня пажараў з тэрыторыі Украіны няма.
У беларускім Міністэрстве лясной гаспадаркі заявілі, што сытуацыя пад кантролем:
«Афіцыйна заяўляем: на тэрыторыі Беларусі агню няма. Пагрозы пакуль таксама няма. Да мяжы з нашай краінай — 7 кілямэтраў. Мінлясгас уважліва сочыць за становішчам у суседняй дзяржаве», — адзначылі ў ведамстве.
Чым небясьпечныя лясныя пажары ў Чарнобыльскай зоне
- Чарнобыльская зона адчужэньня — гэта радыяцыйна забруджаная тэрыторыя, дзе прыродныя пажары нясуць падвойную небясьпеку.
- Пры гарэньні зь ляснога подсьцілу і глебы вызваляюцца радыяактыўныя часьцінкі, назапашаныя тут у выніку катастрофы 1986 году.
- Усякае маштабнае загараньне аўтаматычна падвышае рызыку распаўсюджваньня радыяактыўнага пылу.
- Вецер як галоўны фактар распаўсюджваньня агню адначасова можа разносіць забруджанае паветра на суседнія рэгіёны, у тым ліку Беларусі.
