Як паведаміў Белстат 29 красавіка 2026 году, доля жыхароў гарадоў і пасёлкаў гарадзкога тыпу сярод беларусаў склала 80 працэнтаў, доля жыхароў сельскіх населеных пунктаў — 20 працэнтаў.
Па выніках перапісу насельніцтва 2019 года ў гарадах Беларусі пражывала 77,8%, паведамляў Белстат.
Як паведамляе Сусьветны банк, доля гарадзкога насельніцтва ў Эўразьвязе складае 75%, але яна адрозьніваецца паміж краінамі. Так, у Бэльгіі доля гарадзкога насельніцтва складае 88%, у Даніі — 89%, а ў Ірляндыі — 64%, Латвіі — 68%, Літве — 69%.
Старшыня Белстату Іна Мядзьведзева пасьля перапісу 2019 года заклікала людзей заставацца ў тых рэгіёнах, у якіх яны жывуць:
«Самае галоўнае — гэта чалавек, яго заможнасьць, паляпшэньне камфорту таго асяродку, у якім ён жыве. Гэта разьвіцьцё рэгіёнаў. Кожны чалавек павінен атрымаць дастойную працу і жыць у тым рэгіёне, у якім ён сёньня жыве. І любіць тую радзіму і тую зямлю, на якой ён сёньня пражывае».
Аляксандр Лукашэнка сярод іншага заяўляў, што сваёй задачай бачыць «выратаваньне беларускай вёскі». Пра гэта ён казаў у прыватнасьці 18 сьнежня на Ўсебеларускім народным сходзе. Лукашэнка не выключае, што для вырашэньня праблемы з адтокам людзей з рэгіёнаў будзе ўстаноўлены ліміт на ўвод новых мэтраў жыльля ў Менску — ня больш за 300 тысяч за год.
Беларускія ўлады ня раз заяўлялі, што трэба падтрымаць жыхароў вёскі, на гэта была скіраваная дзяржаўная праграма разьвіцьця аграгарадкоў, будаўніцтва ў вёсках жыльля, сацыяльных і гаспадарчых аб’ектаў, фэрмаў. Але ў краіне надалей працягваецца спад долі сельскага насельніцтва.
Форум