Аднак, як перадае інфармацыйнае агенцтва РАР, ініцыятыва ў гэтым пытаньні належыць Аляксандру Лукашэнку, дадаў кіраўнік МЗС.
«Я не хачу даваць пустых абяцаньняў, бо падобныя „ілжывыя сьвітаньні“ ужо здараліся», — заявіў ён, адзначыўшы, што ў мінулым былі эпізоды «адлігі» у двухбаковых стасунках, калі ў Беларусі не было палітычных зьняволеных.
Міністар замежных справаў Польшчы Радаслаў Сікорскі сказаў на прэсавай канфэрэнцыі:
«Праз 1.860 дзён зьняволеньня ва ўмовах строгага рэжыму наш гераічны суайчыньнік, вязень справы свабоды Анджэй Пачобут знаходзіцца ў Польшчы цэлы і здаровы. Гэта цудоўны дзень. Гэта прыклад цеснага польска-амэрыканскага саюзу. Гэты дзень ня быў бы магчымы без прэзыдэнта Дональда Трампа, яго рашэньня і яго спэцыяльнага прадстаўніка спадара Коўла, а таксама цэлай каманды Дзярждэпартамэнту.
Хачу сардэчна падзякаваць усім, хто прыняў удзел у гэтай апэрацыі, перш за ўсё супрацоўнікам нашых спэцслужбаў, а таксама кіраўніцтву Міністэрства юстыцыі, пракуратуры, супрацоўнікам МЗС, якія ў супрацоўніцтве з польскімі і амэрыканскімі інстытуцыямі і інстытуцыямі некаторых іншых дзяржаў, якія скаардынавалі свае дзеяньні, змаглі дайсьці да сёньняшняга абмену».
Хто такі Анджэй Пачобут
- Анджэй Пачобут — вядомы журналіст і грамадзкі дзеяч, сябра незарэгістраванага Саюзу палякаў Беларусі.
- Нарадзіўся 17 красавіка 1973 году ў Вялікай Бераставіцы (Горадзенская вобласьць). Яму 49 гадоў. Жыве ў Горадні. Жанаты, двое дзяцей: старэйшая дачка вучыцца ў Горадні ў мэдычным унівэрсытэце, малодшы сын ходзіць у школу.
- У 2002 годзе прыйшоў у журналістыку. Працаваў у першых незалежных горадзенскіх газэтах «Пагоня», «Дзень», «Мясцовы час», рэспубліканскай газэце «Народная воля», газэце СПБ на польскай мове Głos znad Niemna («Голас з-над Нёману»). Быў рэдактарам часопіса СПБ Magazyn Polski na uchodźstwie, карэспандэнтам буйнога польскага выданьня Gazeta Wyborcza. Займаўся тэмамі, зьвязанымі з гісторый спэцслужбаў СССР, антысавецкага супраціву ў Заходняй Беларусі, Арміяй Краёвай.
- 25 сакавіка 2021 году Андрэя Пачобута затрымалі, прыйшоўшы да яго зь ператрусам.
- Трох фігурантак «польскай справы» Ірэну Бярнацкую, Марыю Цішкоўскую і Ганну Панішаву у траўні 2021 вызвалілі ўзамен на выезд зь Беларусі. Пачобут адмовіўся ад такой прапановы. Старшыню Анжаліку Борыс у сакавіку 2022 вызвалілі зь СІЗА пад хатні арышт.
- У Анджэя хворае сэрца. Раней, асабліва ў сьпёку, у яго часта здараліся прыступы, ён слабеў, клаўся ў шпіталь праз парушаны рытм сэрца.
- За артыкул пра напад СССР на Польшчу ў верасьні 1939-га Анджэя Пачобута абвінавацілі ў «распальваньні варожасьці па нацыянальнай прыкмеце». У публікацыі Пачобут назваў напад СССР на Польшчу 17 верасьня 1939 году агрэсіяй. Таксама ў матэрыялах крымінальнай справы фігуравалі заявы журналіста ў абарону польскай меншасьці ў Беларусі, артыкул пра здушэньне беларускіх пратэстаў у 2020 годзе і тэкст 2006 году пра аднаго з камандзіраў польскага антыкамуністычнага падпольля на Горадзеншчыне.
- У 2023-м Пачобуту вынесьлі прысуд — 8 гадоў калёніі. 21 чэрвеня стала вядома, што палітвязьня перавялі ў наваполацкую калёнію № 1.
- 28 красавіка 2026 году быў вызвалены і вывезены ў Польшчу ў рамках абмену зьняволенымі.
Форум