Сустрэча адбылася амаль праз два месяцы пасьля пачатку авіяўдараў ЗША і Ізраілю па Іране.
«Мы бачым, як мужна і гераічна змагаецца народ Ірану за сваю незалежнасьць, за свой сувэрэнітэт», — заявіў Пуцін.
Ён паведаміў, што на мінулым тыдні атрымаў пасланьне ад цяперашняга вярхоўнага лідэра Ірану Муджтабы Хамэнэі, якога ня бачылі на публіцы ад пачатку вайны.
Пуцін і Аракчы заявілі пра «стратэгічнае партнэрства» краін.
«Усім даказана, што ў Ірана ёсьць такія сябры і хаўрусьнікі, як Расейская Фэдэрацыя, якія акурат у цяжкія хвіліны стаяць побач з Іранам», — сказаў Абас Аракчы.
Сёньня ж прэзыдэнт ЗША Дональд Трамп сустрэўся з высокапастаўленымі чыноўнікамі нацыянальнай бясьпекі, каб абмеркаваць тупік у перамовах з Іранам.
Раней на паведамленьні пра тое, што Расея перадавала Ірану разьведвальныя зьвесткі, зьвярнулі ўвагу ў Кангрэсе ЗША.
«Злучаныя Штаты супрацьстаяць ня проста Ірану, а шырокай восі Расея — Іран», — заявіў кангрэсмэн Джо Ўілсан на нядаўніх слуханьнях Хэльсынскага камітэту.
Паводле Ўілсана, Расея і Іран супрацоўнічаюць у гандлі зброяй, абмене разьведвальнымі зьвесткамі і ў абыходзе санкцый.
Паездка Аракчы ў Маскву адбылася на фоне зрыву перамоваў з ЗША. Разам з тым, Пуцін можа быць зацікаўлены ў тым, каб схіліць Іран да некаторых саступак, асабліва датычных ядзернай праграмы, сказаў іранскі палітычны аналітык у выгнаньні Амір Чагакі Радыё Фарда.
«Для Расеі выжываньне Ісламскай Рэспублікі — і тое, каб не было сюрпрызаў накшталт сырыйскага — жыцьцёва важнае», — сказаў ён.
«Ядзернае пытаньне, канкрэтна гэтыя 450 кіляграмаў і ўзбагачэньне, застаецца цэнтральнай тэмай. Калі Расея зможа праз узаемадзеяньне з Трампам і Тэгеранам — альбо з Муджтабой Хамэнэі, альбо зь любой іншай групай — вырашыць праблему, разбавіўшы частку ўрану альбо перадаўшы рэшту ў Расею прымальным спосабам, гэта сталася б вялікай паслугай Пуціна Трампу», — лічыць Чагакі.
Наўзамен Пуцін можа прапанаваць ЗША пайсьці на «частковыя саступкі, дазволіўшы Ірану пэўнае ўзбагачэньне з больш строгімі лімітамі, магчыма, праз 10 гадоў».
Пуцін падчас сустрэчы з Аракчы заявіў, што Расея зробіць усё, «што ў нашых інтарэсах, у інтарэсах людзей у рэгіёне, каб мір быў дасягнуты як мага хутчэй».
Напярэдадні Трамп заявіў Fox News, што Іран «можа патэлефанаваць», калі захоча паразмаўляць, але дадаў: «Яны ведаюць, што павінна быць у пагадненьні. Усё вельмі проста: яны ня могуць мець ядзернай зброі».
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
Форум