Катэдра беларусістыкі Варшаўскага ўнівэрсытэту выпусьціла калектыўную манаграфію «Białoruś oczami młodych. Studia nad dekolonizacją» («Беларусь вачыма моладзі: дасьледаваньні дэкаланізацыі») пад рэдакцыяй кіраўніка катэдры прафэсара Андрэя Масквіна.
Да ўдзелу ў шматаўтарскай манаграфіі запрасілі маладых дасьледнікаў, піша bellit.info. Аўтарамі выступілі студэнты і асьпіранты катэдры беларусістыкі, дактаранты з Доктарскай школы гуманітарных навук Варшаўскага ўнівэрсытэту і Доктарскай школы ў Чыкага (ЗША), а таксама незалежныя дасьледнікі.
Аўтары выданьня разглядаюць розныя пытаньні, такія як антыімпэрская думка, якая сустракаецца ў кананічных тэкстах Канстанціна Каліноўскага, Францішка Багушэвіча і Вацлава Ластоўскага; сьляды савецкай рэальнасьці і месцы памяці ў кнізе «Хлопчык і сьнег» Альгерда Бахарэвіча; вобраз пэрыяду адлігі ў сучаснай літаратуры (на прыкладзе аповесьці Ўладзімера Някляева); гібель беларускага мястэчка і становішча габрэяў у Беларусі ў час І усясьветнай вайны; адлюстраваньне Галакосту ў тэатры; «Беларускі правапіс» (1941).
Форум