Пасьля звароту выкладчыка Дзьмітрыя Аношкі да Аляксандра Лукашэнкі БДУІР апублікаваў сярэдні заробак выкладчыкаў.
«У сувязі з дыскусіямі ў інфаполі публікуем афіцыйныя дадзеныя ўнівэрсытэту. Ключавыя лічбы: сярэдні заробак прафэсарска-выкладчыцкага складу ў 2025 годзе — 2 960,75 руб. Гэта азначае, што заробак выкладчыкаў БДУІР на 9,9% вышэйшы за сярэдні ў краіне», — гаворыцца ў тэлеграм-канале ўнівэрсытэту.
«Падвышэньне заработных платаў зьвязана з нарошчваньнем экспартных праектаў БДУІР, выкананьнем актуальных дзяржаўных задачаў. Унівэрсытэт працягвае работу дзеля падвышэньня прывабнасьці акадэмічнай кар’еры і падтрыманьня прафэсарска-выкладчыцкага складу», — гаворыцца ў паведамленьні ВНУ.
Што расказаў Дзьмітры Аношка
Раней Дзьмітры Аношка, які працуе выкладчыкам ў Беларускім дзяржаўным ўнівэрсытэце інфарматыкі і радыёэлектронікі больш за 12 гадоў, паведаміў пра малы заробак і паказаў выпіску з залічэньняў у Белінвэстбанк за лістапад 2025 году, дзе ягоны заробак склаў 87 рублёў.
Аношка сьцьвярджае, што кіраўніцтва ўнівэрсытэту такім чынам «імкнецца яго выжыць». У адказе БДУІР ягонага прозьвішча не называюць.
