Пра гэта піша праект «Север.Реалии» з спасылкай на зьвесткі расейскіх судоў. Паводле гэтых зьвестак, у 2022 і 2023 гадах за забойствы ў Расеі асудзілі сем дэзэртэраў і тых, хто самавольна пакінуў частку. У 2024 годзе іх было ўжо 26, а ў 2025-м — 86. У 2026 годзе ў суды паступіла ўжо 25 падобных справаў.
Гаворка ідзе менавіта пра дэзэртэраў і тых, хто самавольна пакінуў частку, а не пра ўдзельнікаў вайны ва Ўкраіне ў цэлым. Выданьне «Вёрстка» раней падлічыла, што за амаль чатыры гады вайны тыя, хто вярнуўся з фронту, забілі і пакалечылі ў Расеі больш за тысячу чалавек.
У 105 справах ужо вынесеныя прысуды. Абвінавачаныя атрымалі ад 8 да 13 гадоў зьняволеньня. Некаторыя справы былі прыпыненыя альбо спыненыя празь сьмерць абвінавачанага ці «адсутнасьць рэальнай магчымасьці ўдзелу абвінавачанага ў працэсе».
Раней праект Frontelligence Insight паведамляў на падставе вывучэньня адкрытых крыніц, што ўзровень дэзэртэрства ў расейскім войску ў 2025 годзе вырас удвая ў параўнаньні з 2024 годам.
Жыхары многіх рэгіёнаў скардзіліся на рост колькасьці забойстваў і іншых цяжкіх злачынстваў пасьля вяртаньня ў іхныя гарады тых, хто ваяваў ва Ўкраіне.
Форум