Пра лідэрства партыі прыхільнікаў Радэва сьведчаць некалькі апытаньняў на выхадзе з выбарчых участкаў, якія прыводзяць баўгарскія СМІ. Паводле агенцтва «Мяра», «Прагрэсіўную Баўгарыю» падтрымалі больш за 38% выбарнікаў. Апытаньне агенцтва «Трэнд» дае прыхільнікам Радэва 39% галасоў. Гэтага мала для таго, каб атрымаць у парлямэнце абсалютную большасьць, аднак выглядае, што без «Прагрэсіўнай Баўгарыі» нельга будзе сфарміраваць урад.
Папярэднія вынікі падліку галасоў будуць вядомыя раніцай у панядзелак. Яўка склала каля 46 працэнтаў – гэта больш, чым на папярэдніх выбарах.
Выбары ў Баўгарыі праводзяцца восьмы раз за апошнія пяць гадоў. Кожны раз урадавыя кааліцыі аказваліся недаўгавечнымі. Радэў абяцае нарэшце прынесьці стабільнасьць і правесьці неабходныя рэформы, у тым ліку ў сфэры барацьбы з карупцыяй.
Пры гэтым на пасадзе прэзыдэнта Радэў сыстэматычна крытыкаваў паводзіны NATO і асуджаў спробы Ўкраіны абараніць сябе ад расейскай агрэсіі. У сакавіку 2023 году на саміце Эўразьвязу, які абмяркоўваў закупку 1 мільёна снарадаў для Ўкраіны, Радэў ня даў згоды на ўдзел Сафіі ў гэтай праграме, а таксама выказаўся супраць паставак баўгарскіх боепрыпасаў ва Ўкраіну праз трэція краіны.
