Мікола Статкевіч пасьля вызваленьня доўга заставаўся бяз пашпарта, а цяпер ён знайшоўся. Прычым не ў Глыбокім, дзе Статкевіч сядзеў, а ў Менску, у СІЗА-1. Пра гэта сам палітычны дзяяч напісаў у сваім канале ў Тэлеграме.
«Разам з пашпартам знайшліся і мае турэмныя рэчы, сярод якіх — „судовы“ прысуд і рашэньне „апэляцыйнай інстанцыі“».
Статкевіч мяркуе, што для будучых дасьледнікаў ці сьледчых гэта будуць цікавыя дакумэнты.
Таксама сярод дакумэнтаў ёсьць судовае рашэньне, якое забараняе Статкевічу пакідаць Беларусь і наведваць казіно. Наконт апошняга палітык зыранізаваў, напісаўшы насупраць пункту аб забароне: «які жах!»
У сьнежні 2021 году Мікалая Статкевіча асудзілі на 14 гадоў пазбаўленьня волі ў палітычна матываванай справе. У верасьні 2025 году ён быў вызвалены разам зь іншымі вязьнямі, але пасьля адмовы пакідаць Беларусь яго даставілі ў тую ж Глыбоцкую калёнію, дзе ён адбываў тэрмін. Да свайго вызваленьня Статкевіча больш як 2,5 году трымалі ў поўнай ізаляцыі ад вонкавага сьвету.
19 лютага 2026 году стала вядома, што Статкевіч знаходзіцца ў сваім доме, дзе аднаўляецца пасьля перанесенага ў турме інсульту.
17 сакавіка каля дому затрымалі жонку палітыка Марыну Адамовіч, але праз 4,5 гадзіны бяз допыту яе выпусьцілі з пастарунку міліцыі.
Форум