Як паказалі вынікі 2025 году, расейцы ахвотна наведваюць санаторыі, якія належаць кіраўніцтву справамі Лукашэнкі.
У той час, калі практычна ўсе прадстаўнікі беларускага дзяржаўнага бізнэсу і важкая частка прыватных кампаніяў нясуць страты, тры ўстановы кіраўніцтва справамі Лукашэнкі сабралі адносна нядрэнныя дывідэнды дзякуючы зьбядненьню расейцаў і закрытым межам.
Маючы ўсё больш абмежаваньняў на выезд з сваёй краіны, расейцы шукаюць іншых спосабаў адпачынку і цяпер часьцей выбіраюць беларускія дзяржаўныя санаторыі ў Расеі.
Як паглядзеў партал «Белорусы и рынок», выручка найбуйнейшай установы — санаторыю «Беларусь» пад Сочы — вырасла больш як на 10% і склала 1,3 млрд расейскіх рублёў (або 48 653 700 беларускіх рублёў).
Прыбытак яго кіроўнай кампаніі вырас яшчэ вышэй — больш за 30% у параўнаньні з 2024 годам. Гэта крыху больш за 80 млн расейскіх рублёў (або 2 994 148 беларускіх рублёў).
Санаторый «Белая Русь» пад Туапсэ зарабіў летась 1,1 млрд расейскіх рублёў (або 41 169 755 беларускіх). Прыбытак яго таксама вырас і таксама больш як на 30% — да 90,8 млн расейскіх рублёў (або 3 398 287 беларускіх рублёў).
Вырасьлі продажы нават у санаторыю «Беларусь» у Ялце, у акупаваным Крыме, дзе часта адбываюцца атакі бесьпілётнікаў і іншыя баявыя дзеяньні. Прыбытак вырас прыкладна на 60%. Санаторый утаргаваў каля 300 млн. расейскіх рублёў (11 237 244 беларускіх). А вось прыбытак быў мінімальны і застаўся на папярэднім узроўні — 2,3 млн. расейскіх рублёў (86 153 беларускіх рублёў).
Форум