Паводле інфармацыі прэс-службы штабу УСУ, на якую спасылаецца ўкраінская служба Свабоды, пацярпела інфраструктура нафтаперапрацоўчага заводу «Лукойл-Ніжагароднафтааргсынтэз» (Кстова Ніжагародзкай вобласьці), на тэрыторыі прадпрыемства ўзьнік маштабны пажар.
Украінскі Генштаб адзначае, што «Лукойл-Ніжагароднафтааргсынтэз», які не ўпершыню зазнае нападу, займае стратэгічнае месца ў расейскай нафтаперапрацоўчай прамысловасьці, у прыватнасьці, забясьпечваючы палівам крытычна важную Маскоўскую вобласьць. Гэта каля 30% усяго спажываньня бэнзіну ў Расеі. Таксама нафта ідзе ў расейскае войска.
Маштаб шкоды ўдакладняецца.
Украінскія вайскоўцы таксама паведамілі пра пажар у выніку чарговага пашкоджаньня інфраструктуры порту Прыморск на Балтыйскім моры — гэта адзін з найбуйнейшых портаў Расеі, які ўдзельнічае ў перавозцы нафтапрадуктаў.
Генэральны штаб паведамляе пра пашкоджаньне складу для захоўваньня авіяцыйнай тэхнікі ў Саках на тэрыторыі акупаванага Крыму.
У Расеі ўлады прызналі, што адзін з участкаў нафтаводу ў раёне порту Прыморск пашкоджаны абломкамі, а таксама пашкоджаныя два аб’екты Кстоўскага НПЗ.
Форум