Зяленскі назваў умовы, пры якіх Украіна ня будзе наносіць удары па расейскай энэргетыцы

Зяленскі паведаміў пра «сыгналы ад партнэраў» аб скарачэньні ўдараў па расейскай энэргетыцы.

«Мы ня проста наносім удары па Расеі. Мы адказваем. Пасьля пачатку энэргетычнага крызісу ў сьвеце мы атрымалі сыгналы ад некаторых партнэраў аб скарачэньні нашых адказаў на нафтавы і энэргетычны сэктары Расейскай Фэдэрацыі», — сказаў ён.

Зяленскі падкрэсьліў, што Ўкраіна ня будзе ўдараць па расейскай энэргетыцы, калі Расея не ўдарыць па ўкраінскай энэргетыцы. Паводле яго слоў, Кіеў гатовы абмяркоўваць любое спыненьне агню:

«Поўнае спыненьне агню. Спыненьне агню ў энэргетыцы. Спыненьне агню адносна харчовай бясьпекі. Мы ўсё гэта прапанавалі. І мы адкрытыя. Калі расейцы гатовыя, няхай прапануюць на любы тэрмін — мы гатовыя вырашыць гэтае пытаньне».

Кіраўнік Украіны таксама адзначыў, што падчас свайго паездкі па Блізкім Усходзе ён абмеркаваў з лідэрамі краінаў рэгіёна разблякаваньне Армузскага праліва. Ён назваў гэтае пытаньне балючым для ўсяго сьвету, бо блякаваньне праліва правакуе энэргетычны крызіс.

«Краіны Блізкага Усходу ведаюць, што могуць разьлічваць на наш вопыт у гэтай галіне», — сказаў ён.

• Прэзыдэнт Украіны Уладзімір Зяленскі ў канцы мінулага тыдня зьдзейсьніў паездку па краінах Блізкага Усходу. У прыватнасьці, 29 сакавіка ён абмеркаваў з каралём Ярданіі Абдалой II магчымае партнэрства ў сфэры бясьпекі.
• Нядаўна ўрад Расеі прыняў рашэньне забараніць экспарт бэнзіну з Расеі з 1 красавіка на фоне нападаў Украіны на расейскія нафтаперапрацоўчыя аб’екты.
• Пасьля пачатку паўнамаштабнага ўварваньня Расеі розныя абʼекты на тэрыторыі Расейскай Фэдэрацыі падвяргаюцца авіяўдарам. Найбольш частымі абʼектамі нападаў у 2024 і 2025 гадах былі нафтаперапрацоўчыя заводы (НПЗ). Таксама падвяргаюцца ўдарам расейскія абʼекты на акупаваных тэрыторыях Украіны.
• Генэральны штаб Узброеных сіл Украіны пацьвердзіў большасьць нападаў, заявіўшы, што Армія абароны Украіны «сыстэматычна рэалізуе меры, накіраваныя на зьніжэньне баявога патэнцыялу расейскіх акупацыйных войскаў, а таксама на прымушэньне Расейскай Фэдэрацыі спыніць узброеную агрэсію супраць Украіны».