У лісьце Кацярына Бахвалава дзякуе за намаганьні ў вызваленьні яе і іншых палітвязьняў, але просіць працягваць — і вызваліць усіх, у тым ліку ейнага мужа, піша Белсат.
Ліст, які перадала журналістка, выказвае глыбокую ўдзячнасьць прэзыдэнту Злучаных Штатаў Дональду Трампу, спэцыяльнаму пасланьніку Джону Коўлу і намесьніку памочніка дзяржаўнага сакратара ЗША Крыстафэру Сьміту за гуманітарныя намаганьні, якія прывялі да вызваленьня яе самой і яшчэ 249 беларускіх палітвязьняў.
Адначасова Кацярына падкрэсьлівае, што многія яшчэ застаюцца ў зьняволеньні.
«Думаю, што гэтая гуманітарная місія мае гістарычнае значэньне. Да вашых перамоваў зь Менскам многія з нас страцілі надзею. Мы адчувалі сябе вечнымі закладнікамі, бязь яснай будучыні і надзеі на справядлівасьць. У чэрвені 2025 году, калі я стала сьведкай першых вызваленьняў жанчын у межах дамоўленасьцяў паміж Вашынгтонам і Менскам, надзея вярнулася да мяне».
Бахвалава заклікае працягваць дыпляматычныя намаганьні дзеля вызваленьня ўсіх палітвязьняў, у тым ліку журналіста Ігара Ільяша — мужа Кацярыны.
Кацярына Бахвалава (Андрэева) — журналістка тэлеканалу «Белсат». У 2021 годзе Кацярына атрымала 2 гады за стрым з «Плошчы Перамен» у Менску. У зьняволеньні ёй выставілі новае абвінавачаньне — у «здрадзе дзяржаве» — і прысудзілі яшчэ 8 гадоў і 3 месяцы. Вызваліць журналістку ўдалося толькі пасьля перамоваў амэрыканскай адміністрацыі з Лукашэнкам.
Форум