Скарынаўскай бібліятэцы ў Лёндане перадалі частку дзяржаўнага архіву Рады БНР

25 сакавік 2026, 15:57

Гэта дакумэнты, якія зьберагаліся ў былога прэзыдэнта Рады БНР Міколы Абрамчыка.

Сакратар Рады Беларускай Народнай Рэспублікі і Апякунская рада Беларускай Бібліятэкі і Музэю імя Францішка Скарыны ў Лёндане паведамілі пра перадачу Бібліятэцы часткі дзяржаўнага архіву БНР, які зьберагаўся ў Старшыні Рады БНР Міколы Абрамчыка.

Пасьведчаньне, выдадзенае намесьніку старшыні Рады БНР Васілю Захарку ў 1920 годзе

Пасьля сьмерці Міколы Абрамчыка ў 1970 годзе, рашэньнем Рады БНР дакумэнты Рады зь яго архіву мусілі быць перададзеныя на захаваньне і для дасьледаваньня ў Бібліятэку імя Ф. Скарыны, аднак да 2025 году апынуліся па-за валоданьнем Рады БНР.

Ліст Васіля Захаркі на адрасы Міколы Абрамчыка і Ларысы Геніюш, напісаны лацінскай графікай

«Цяпер, пасьля аднаўленьня ўласнасьці Рады БНР над гэтымі дакумэнтамі, было пагоджана, што Рада БНР перадае Архіў Міколы Абрамчыка на захаваньне і выкарыстаньне Беларускай бібліятэцы ім. Ф. Скарыны да часу складаньня гістарычнага мандату Рады БНР адпаведна Статуту Рады БНР і прыняцьця супольнага рашэньня аб далейшым юрыдычным лёсе Архіву.

Пасьля папярэдняй інвэнтарызацыі Архіву, ён стане даступны дасьледнікам у блізкім часе», — напісала Рада БНР на сваёй старонцы.