Раней агенцтва пісала, што Муджтаба Хамэнэі мог атрымаць раненьні падчас амэрыкана-ізраільскіх удараў, у выніку якіх загінуў яго бацька — аятала Алі Хамэнэі.
Афіцыйнага пацьверджаньня гэтай інфармацыі няма, але іранскія дзяржаўныя СМІ выкарыстоўваюць фармулёўкі, якія ўскосна пацьвярджаюць раненьне. Вядоўца дзяржаўнай тэлевізіі назваў Муджтабу Хамэнэі «джанбазам» (параненым вэтэранам) «вайны Рамадана» — так у Іране называюць цяперашні канфлікт з ЗША і Ізраілем.
Паводле крыніцаў агенцтва, раненьне і асьцярогі за бясьпеку могуць тлумачыць маўчаньне Муджтабы Хамэнэі. Пры гэтым фактычную ўладу, як сьцьвярджаюць суразмоўцы Reuters, цяпер мае Корпус вартавых ісламскай рэвалюцыі (КВІР).
Крыніцы адзначаюць, што КВІР «быў разьюшаны» пасьля выбачэньняў іранскага прэзыдэнта Масуда Пэзэшкіяна перад краінамі Пэрсыдзкай затокі за ўдары па амэрыканскіх вайсковых аб’ектах на іхных тэрыторыях. Адзін з суразмоўцаў падкрэсьліў, што Алі Хамэнэі раней умеў стрымліваць Корпус, балянсуючы паміж ягонымі інтарэсамі і думкай палітычных і рэлігійных элітаў.
«Цяпер жа, нават калі новы лідэр будзе дастаткова здаровы, каб узяць стырно ў свае рукі, апошняе слова ў ключавых рашэньнях, верагодна, застанецца за Корпусам вартавых», — адзначыў суразмоўца Reuters.
Паводле крыніцаў, менавіта КВІР правёў кандыдатуру Муджтабы Хамэнэі з разьлікам на тое, што ён падтрымае іхны жорсткі курс.
Некалькі высокапастаўленых іранскіх суразмоўцаў Reuters лічаць, што ягонае прызначэньне можа прывесьці да больш агрэсіўнай зьнешняй палітыкі і ўзмацненьня ўнутраных рэпрэсіяў.
Двое зь іх асьцерагаюцца, што дамінаваньне КВІР канчаткова ператворыць Іран у вайсковую дзяржаву «пад тонкай заслонай рэлігійнай легітымнасьці».
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
Форум