Пяць футбалістак жаночай зборнай Ірану атрымалі гуманітарныя візы Аўстраліі. Пасьля гульні яны пакінулі гатэль, дзе кватаравала каманда, і пайшлі ў паліцыю, дзе напісалі заяву з просьбамі аб прытулку. Гэта дазволіць ім застацца ў краіне і не вяртацца на радзіму, дзе ім можа пагражаць небясьпека пасьля таго, як на Кубку Азіі яны адмовіліся сьпяваць дзяржаўны гімн.
Міністар унутраных спраў Аўстраліі Тоні Бэрк паведаміў BBC, што спартовак перамясьцілі ў бясьпечнае месца.
Іншым гуліцам зборнай таксама паведамілі, што ў іх ёсьць магчымасьць атрымаць гуманітарныя візы. Пакуль ім дазволілі заставацца ў Аўстраліі.
Абарону аўстралійскі бок даў іранкам пасьля таго, як прэзыдэнт ЗША Дональд Трамп пагаварыў па тэлефоне з прэм’ер-міністрам Аўстраліі Энтані Албанэзэ і заклікаў даць спартоўкам прытулак. З аналягічнымі заклікамі выступілі сын нябожчыка шаха Ірана Рэза Пэхлеві, праваабаронцы, а таксама пісьменьніца Джоан Роўлінг, аўтарка кніг пра «Гары Потэра».
2 сакавіка жаночая зборная Ірану правяла першы паядынак Кубку Азіі, які праходзіў у Аўстраліі. У час выкананьня нацыянальнага гімну футбалісткі стаялі моўчкі, некаторыя ўсьміхаліся. У Іране гэта расцанілі як палітычны пратэст. Вядоўца дзяржаўнага тэлеканалу Махамад Шахбазі заклікаў «строга» пакараць спартовак і назваў іх «здрадніцамі ваеннага часу». Ужо ў наступных гульнях іранкі сьпявалі гімн.
Некаторыя праваабаронцы сьцьвярджаюць, што спартоўкі пакінулі ў Іране сем'і, а ў некаторых там застаюцца дзеці, якія могуць апынуцца ва ўразьлівым становішчы. Магчыма, гэта было прычынай, чаму дзяўчыны ў наступных сустрэчах сьпявалі гімн.
CNN з спасылкай на сваю крыніцу паведамляе, што пасьля матчаў астатнія ўдзельніцы каманды ня здолелі паляцець на радзіму, бо ніводная краіна не дазваляе самалёту з іранкамі сесьці ў сваім аэрапорце, каб зрабіць перасадку на самалёт да Ірану.
Форум