Як паведаміла Радыё Свабодная Эўропа / Радыё Свабода, такім чынам Дональд Трамп адрэагаваў на новыя ўдары Ірану 9 сакавіка па Ізраілі і краінах Пэрсыдзкай затокі пасьля абраньня Муджтабы Хамэнэі вярхоўным лідэрам.
«Мы перамагаем вельмі рашуча. Мы значна апярэджваем графік», — сказаў Трамп на прэсавай канфэрэнцыі ў Флёрыдзе.
«Гэта хутка скончыцца». На пытаньне, ці скончыцца гэта на гэтым тыдні, ён выказаў здагадку, што не, але адказаў: «Хутка. Вельмі хутка».
«Я не дазволю тэрарыстычнаму рэжыму трымаць сьвет у закладніках і спрабаваць спыніць пастаўкі нафты. І калі Іран зробіць што-небудзь для гэтага, ён атрымае ўдар значна, значна больш жорсткага ўзроўню», — сказаў Трамп.
Трамп заявіў CBS, што ў яго ёсьць кандыдатура на замену Муджтабы Хамэнэі, але ён адмовіўся назваць імя. Раней ён заявіў іншым інфармацыйным агенцтвам, што «не задаволены» рашэньнем Ірану перадаць галоўную пасаду Хамэнэі і назваў гэта «вялікай памылкай».
Тым часам дзяржаўны сакратар ЗША Марка Рубіё абвінаваціў Іран у спробе «трымаць сьвет у закладніках», наносячы ўдары ў адказ па ўсім Блізкім Усходзе, і заявіў, што ваенныя апэрацыі ЗША, накіраваныя на стрымліваньне магчымасьцей Тэгерану, ідуць паводле пляну.
Крэмль паведаміў аб тэлефоннай размове Трампа і Пуціна
Юрый Ушакоў, памочнік расейскага прэзыдэнта, паведаміў, што 9 сакавіка на ініцыятыву Дональда Трампа адбылася тэлефонная размова з Уладзімірам Пуціным.
«Акцэнт, натуральна, быў зроблены на сытуацыі вакол канфлікту з Іранам і на трохбаковых перамовах па ўкраінскім урэгуляваньні, якія працягваюцца пры ўдзеле прадстаўнікоў ЗША», — адзначаецца на сайце Крамля.
Паводле Ушакова, размова працягвалася амаль гадзіну і мела «дзелавы, шчыры і канструктыўны характар».
У паведамленьні адзначаецца, што Пуцін выказаўся за палітыка-дыпляматчные ўрэгуляваньне іранскага канфлікту з улікам ранейшых яго кантактаў з кіраўніцтвам гэтай краіны. Бакі абмеркавалі і сытуацыю ў Вэнэсуэле.
На сайце Белага дома інфармацыя аб тэлефоннай размове Трампа і Пуціна пакуль адсутнічае.
Агенцтва Reuters паведаміла, што тэлефонная размова Трампа і Пуціна адбылася празь некалькі гадзін пасьля заявы Пуціна аб тым, што вайны ЗША і Ізраіля супраць Ірану справакавала глябальны энэргетычны крызіс.
«У мяне была вельмі добрая размова з прэзыдэнтам Пуціным», — працытавала Трампа агенцтва. Амэрыканскі прэзыдэнт дадаў, што Пуцін хоча дапамагчы ў пытаньнях Ірану.
«Я сказаў: «Вы маглі б быць больш карыснымі, калі б скончылі вайну паміж Украінай і Расеяй. Гэта будзе больш карысным», — заявіў Дональд Трамп.
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
Форум