На старонцы амбасады ў Фэйсбуку гаворыцца, што цяпер у продажы ёсьць квіткі на рэйсы авіякампаніяў El Al, Israir, Arkia і Air Haifa. Амбасада адзначае, што «самы хуткі і зручны спосаб выезду — набыць квіток наўпрост на афіцыйным сайце авіякампаніі ці празь ліцэнзаванае турыстычнае агенцтва». Свой допіс амбасада назвала «важнай інфармацыяй».
Пры гэтым «турысты і замежныя грамадзяне, якія апынуліся ў крытычнай сытуацыі і ня могуць самастойна зарэзэрваваць білет, могуць запоўніць адмысловую форму Міністэрства транспарту Ізраілю для атрыманьня дапамогі ў арганізацыі выезду». Але яе запаўненьне не гарантуе таго, што заяўнік атрымае месца ў самалёце, а таксама не вызваляе ад патрэбы самастойна аплаціць білет адпаведнай авіякампаніі.
Кампанія «Белавія», як і перавозьнікі з іншых краін, пасьля пачатку ваенных дзеяньняў ізраільскіх і амэрыканскіх уладаў у Іране рэйсы ў Ізраіль скасавала.
Амбасада Беларусі ў Эгіпце 9 сакавіка паведаміла пра заплянаваны на 10 сакавіка чарговы вывазны рэйс «Белавія» з Аману.
Працягваюцца эвакуацыйныя рэйсы беларускага перавозьніка з Аб’яднаных Арабскіх Эміратаў, пра анансаваную раней магчымасьць арганізацыі аналягічных рэйсаў з Катару «Белавія» пакуль не паведамляе.
Аляксандар Лукашэнка пасьля забойства найвышэйшага кіраўніка Ірану аяталы Алі Хамэнэі некалькі дзён маўчаў. А затым пры сустрэчы з іранскім дыпляматам назваў «напад Ізраілю пры падтрымцы ЗША на Іран» «вераломным» і «непрымальным».
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
Форум