Пра гэта паведамляецца на рэсурсах кампаніі, пры гэтым рэйсы ня цалкам вывазныя, паведамляе @belavia_official.
Таксама авіякампанія нагадвае, што надалей выконвае эвакуацыйныя (вывазныя) рэйсы для пасажыраў, якія ўжо купілі білеты.
На адным з рэсурсаў продажу авіябілетаў удалося знайсьці чатыры білеты на рэйс Дубай — Менск на 10 сакавіка, білет каштуе каля 39 тысяч расейскіх рублёў (каля 500 даляраў ЗША), на 11 сакавіка засталося 7 білетаў. З кожнай хвілінай білеты даражэюць.
Тым часам авіякампанія FlyDubai вывозіць беларусаў зь білетамі да Менску ў Маскву ці Казань, як паведамляюць пасажыры, бяз трансфэру ў Беларусь. Пасажырам гэтай авіякампаніі вывазных рэйсаў наўпрост у Беларусь не абяцаюць, паведамляе Беларускі рэспубліканскі саюз турыстычных арганізацыяў.
Дзяржаўнае агенцтва БелТА з спасылкай на амбасаду Беларусі ў Эгіпце паведаміла, што 10 сакавіка кампанія «Белавія» арганізуе эвакуацыйны рэйс з Аману. Вылет адбудзецца з горада Салала.
Генэральны дырэктар авіякампаніі «Белавія» Ігар Чаргінец раней у этэры «Беларусь 1» сказаў, што ў ААЭ маглі затрымацца каля тысячы беларусаў. 5 сакавіка ў Менск прыляцеў эвакуацыйны рэйс з Аману. 4 сакавіка «Белавія» выканала два эвакуацыйныя рэйсы з Дубаю. На першым рэйсе былі 189 пасажыраў, на другім — 283, у тым ліку двое немаўлят.
5 сакавіка міністар замежных справаў Беларусі Максім Рыжанкоў па тэлефоне паразмаўляў зь міністрам замежных спраў ААЭ Абдалом ібн Заедам аль-Нахаянам. Як паведамляе замежнапалітычнае ведамства Беларусі, размова тычылася становішча на Блізкім Усходзе. Рыжанкоў выказаў ААЭ ўдзячнасьць за клопат пра беларускіх турыстаў, якія апынуліся ў гэтай краіне, а таксама выказаў суразмоўцу спачуваньні ў зьвязку з разбурэньнямі ад абстрэлаў.
Пры гэтым варта адзначыць, што ўлады Беларусі, маючы добрыя зносіны з ААЭ, шчыльна сябруюць і з Іранам, які абстраляў Дубай і Абу-Дабі за супрацу са Злучанымі Штатамі. Раней Аляксандар Лукашэнка сустракаўся з аяталом Алі Хамэнэі, якога забілі ЗША і Ізраіль у паветранай атацы на Тэгеран. А 4 сакавіка ён сустрэўся з надзвычайным і паўнамоцным паслом Ірану ў Беларусі Алірэзом Санэі. Лукашэнка выказаў спачуваньні з прычыны гібелі Хамэнэі і назваў супольную апэрацыю Ізраілю і ЗША «вераломным нападам», у выніку якога загінулі мірныя жыхары і дзеці.
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.