Іран пасьля абраньня новага лідэра працягвае ўдары па Ізраілі і краінах Пэрсыдзкай затокі

Радыё Свабодная Эўропа / Радыё Свабода

09 сакавік 2026, 08:41

Наступствы іранскага ўдару па Бэйруце. Скрын зь відэазапісу AFPTV, зробленага 9 сакавіка 2026 году

Іран адзначыў першыя гадзіны пасьля абраньня Муджтабы Хамэнэі вярхоўным лідэрам, нанёс удары ракетамі і бесьпілётнікамі па Ізраілі і краінах Пэрсыдзкай затокі — Катары, Саудаўскай Арабіі, Аб’яднаных Арабскіх Эмірата і Кувэйце.

«Іран выпусьціў першую хвалю ракет пад кіраўніцтвам аятолы Муджтабы Хамэнэі па акупаваных тэрыторыях», — заявіў дзяржаўны вяшчальнік IRIB у Telegram раніцай 9 сакавіка, паведаміла Радыё Свабодная Эўропа / Радыё Свабода.

Паведамленьне суправаджалася фотаздымкам з «Да вашага распараджэньня, Саід Муджтаба».

У Ізраілі паведамілі, што адна жанчына атрымала раненьні сярэдняй цяжкасьці. Ізраільскія вайскоўцы ў сваю чаргу заявілі аб пачатку новай хвалі ўдараў па «інфраструктуры рэжыму» ў цэнтральным Іране.

Як паведаміла агенцтва AFP, Міністэрства аховы здароўя Бахрэйну раніцай 9 сакавіка заявіла, што ў выніку начной атакі іранскага бесьпілётніка на востраў Сітра раненьні атрымалі 32 мірныя жыхары, усе грамадзяне Бахрэйну, у тым ліку дзеці.

У сталіцы Катару адбылося некалькі выбухаў, а Саудаўская Арабія, Абʼяднаныя Арабскія Эміраты і Кувэйт паведамілі пра новыя напады.

У Саудаўскай Арабіі заявілі, што 8 сакавіку ў выніку іранскіх удараў загінулі 2 чалавекі і яшчэ 12 атрымалі раненьні.

ГЛЯДЗІЦЕ ТАКСАМА:

Новым лідэрам Ірану стаў сын забітага Хамэнэі. Што пра яго вядома?

Вайсковая апэрацыя ЗША і Ізраілю супраць Ірану

28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.

Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.

Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.

Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.

Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.

Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.

У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.

2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.

У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.

8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.

8 красавіка ўступіла ў сілу замірэньне, але ў рэгіёне Пэрсыдзкай затокі працягваюцца спарадычныя выпадкі гвалту, у тым ліку напады на караблі з боку тэгеранскіх сілаў, як і ўдары ЗША па Іране. Пазьней замірэньне некалькі разоў працягвалі, але штораз парушалі. Адносны спакой наступіў у чэрвені 2026 году, але 25 чэрвеня іранскія сілы атакавалі некалькі караблёў у Армускай пратоцы, якія эвакуавалі зь небясьпечнай зоны.