Як адзначаецца ў паведамленьні МЗС Літвы, Кястуціс Будрыс падчас пазачарговага пасяджэньня Рады ў замежных справах Эўразьвязу заявіў, што бясьпека эўрапейскіх грамадзян у краінах, якія церпяць ад канфлікту на Блізкім Усходзе, цяпер павінны стаць прыярытэтам.
«Неабходныя скаардынаваныя дзеяньні на ўзроўні ЭЗ, каб знайсьці спосабы іх вяртаньня і наданьня консульскай дапамогі», — заявіў кіраўнік літоўскай дыпляматыі.
Паводле слоў яго, ядзерныя амбіцыі Ірану, яго дэструктыўныя паводзіны, адкрыта антысэміцкая палітыка, працяглая падтрымка агрэсіі Расеі супраць Украіны і рэпрэсіі супраць яе грамадзян даўно ўяўляюць пагрозу міжнароднай бясьпецы і дэстабілізуюць увесь рэгіён.
Падзеі ў Іране пасылаюць Пуціну, Лукашэнку і іншым дыктатарам выразны сыгнал, што яны ня вечныя, і што гвалт, рэпрэсіі і тэрор будуць адпомшчаныя, мяркуе Кястуціс Будрыс.
«Я хацеў бы, каб усе гэтыя праблемы былі вырашаны з дапамогай звычайных інструмэнтаў міжнароднай дыпляматыі. Аднак мы бачылі, як Іран упарта пазьбягаў сур’ёзнага дыялёгу або толькі імітаваў яго. Іранскі рэжым неаднойчы папярэджвалі аб магчымых наступствах», — дадаў кіраўнік МЗС Літвы.
Кястуціс Будрыс заклікаў Іран неадкладна спыніць напады на амэрыканскія вайсковыя базы на Блізкім Усходзе, у Ізраілі і іншых краінах рэгіёну.
«Мы асуджаем напады Ірану на Бахрэйн, Ярданію, Кувэйт, Катар, Саудаўскую Аравію, Абʼяднаныя Арабскія Эміраты і Аман. Гэта сурʼёзнае парушэньне сувэрэнітэту і тэрытарыяльнай цэласнасьці нашых партнэраў. Мы выказваем спачуваньні родным ахвяр і адначасова нашу цьвёрдую салідарнасьць з краінамі Пэрсыдзкай затокі і ўсімі пацярпелымі краінамі», — заявіў кіраўнік літоўскай дыпляматыі.
Паводле яго, рэгіянальная стабільнасьць цесна зьвязана з глябальнай бясьпекай, і заклікаў усе бакі да стрыманасьці і дээскаляцыі сытуацыі, а міжнародную супольнасьць зрабіць усё, каб пазьбегнуць маштабнага канфлікту.
Міністар таксама дадаў, што Эўропа павінна выкарыстаць гэтую сытуацыю для ўзмацненьня палітычнага ціску на рэжым Пуціна.
Ваенная апэрацыя Ізраілю і ЗША супраць Ірана пачалася 28 лютага. У адказ Іран пачаў абстрэльваць ня толькі Ізраіль, але і іншыя краіны рэгіёну. Тэгеран заявіў, што лічыць законнымі вайсковымі цэлямі ізраільскія аб’екты і амэрыканскія вайсковыя базы.
Баявыя дзеяньні на Блізкім Усходзе, забойства аяталы, іранскія атакі
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Пераемніка Хамэнэі павінна выбраць рада з 88 багасловаў.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ад узаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
Форум