Як паведамляе выданьне ERR, 188-мэтровы грузавы карабель накіроўваўся з Эквадору ў Санкт-Пецярбург, у Эстоніі быў зроблены прыпынак для запраўкі. Паводле ВМС Эстоніі, кантэйнэравоз не ўваходзіць у склад ценевага флёту Расеі і не знаходзіцца пад санкцыямі Эўразьвязу. Але яго падазраюць у магчымай кантрабандзе з Эквадору.
«Гаворка не ішла аб караблі, які належыць ценеваму флёту Расейскай Фэдэрацыі, і гэты карабель таксама не падпадае пад санкцыі Эўрапейскага Зьвязу. Для нас істота апэрацыі палягала менавіта на тым, што, хутчэй за ўсё, мела месца кантрабанда», — паведаміў кіраўнік спэцыяльнага аддзелу эстонскай паліцыі K-komando Марэк Аас.
Паводле яго, апэрацыя прайшла спакойна. Зараз вадаплаў стаіць на якары, але пазьней яго накіруюць у порт для больш дакладнай праверкі.
«Трэба ўлічваць, што гэта немалы карабель, на ім шмат кантэйнэраў, кожны зь якіх трэба праверыць. Так што праца працягваецца», — сказаў Аас.
Экіпаж складаецца з 23 чалавек, усе яны грамадзяне Расеі. Марэк Аас адзначыў, што, нягледзячы на магчымую пагрозу, экіпаж праявіў гатоўнасьць да супрацы і не чыніў супраціву.
У красавіку 2025 году Эстонія затрымала танкер Kiwala зь ценевага флёту Расеі для праверкі яго юрыдычнага статусу і тэхнічнага стану. Ён перавозіў сырую нафту і ішоў у расейскі порт Усьць-Луга паўз тэрытарыяльныя воды Эстоніі.
Начальнік дэпартамэнту паліцыі і памежнай аховы Эстоніі Вэйка Кoмусаар казаў, што на вадаплаве не было сьцяга якой-небудзь дзяржавы, таму ён ня меў законнага права плаваць. Пазьней улады Эстоніі адпусьцілі танкер. Праз тры тыдні РФ затрымала танкер Green Admire, які выйшаў з эстонскага порту Сіламяэ.
Форум