Як паведамілі ва ўкраінскім праекце «Хачу жыць», Руслан Русланавіч Купрацэвіч, які нарадзіўся 31 кастрычніка 2001 году, а 24 ліпеня 2025 году падпісаў кантракт з расейскім войскам у месцах пазбаўленьня волі ў Сургуце, сам папрасіў украінскі бок запісаць яго зварот да Аляксандра Лукашэнкі з просьбай дапамагчы яму хутчэй вярнуцца дадому, дзе яго чакаюць жонка, дзіця, цётка і бабуля.
«Беларусь адзін з галоўных пастаўнікоў наймітаў у расейскую армію. Паводле нашай інфармацыі, на пачатак 2025 году ў складзе расейскай арміі налічваліся прынамсі 742 найміты з пашпартам Рэспублікі Беларусь. Большасьць іх — колішнія або цяперашнія зьняволеныя, але сярод іх ёсьць і тыя, каго завабілі на службу ў акупацыйную армію падманам», — адзначылі ў праекце «Хачу жыць».
Украінскі праект «Хачу жыць» нагадаў беларусам, якія апынуліся ў шэрагах расейскага войска супраць сваёй волі, што тыя могуць у кожны момант да іх зьвярнуцца і вызваліцца «з рабства пуцінскай арміі».
Што вядома пра Руслана Купрацэвіча
Руслан Купрацэвіч служыў у 136-й асобнай мотастралковай брыгадзе расейскіх Сухапутных войскаў, якая дысьлякуецца ў Дагестане і якою камандуе дагестанец.
Згодна з інфармацыяй аб’яднаньня былых сілавікоў BelPol, ён нарадзіўся ў пасёлку Чырвонае Жыткавіцкага раёну Гомельскай вобласьці. Суджаны за крадзяжы.
Колькі беларусаў ва ўкраінскім палоне
Цяпер ва ўкраінскім палоне знаходзяцца сама меней 16 грамадзян Беларусі:
- Вадзім Зайкоўскі з Гомля, нарадзіўся 5 лістапада 1966 году.
- Ігар Сакалоўскі, нарадзіўся 23 чэрвеня 1994 году, служыў у 82-м мотастралковым палку Ўзброеных сілаў Расеі. Сам здаўся ў палон.
- Артур Аракелян , нарадзіўся 13 сьнежня 2004 году, паходзіць зь вёскі Печышчы Сьветлагорскага раёну Гомельскай вобласьці.
- Іван Шабунька, нарадзіўся 17 траўня 1977 году, паходзіць з Мастоў Горадзенскай вобласьці. Падпісаў кантракт з расейскай арміяй 10 чэрвеня 2024 году.
- Сяргей Шустаў, нарадзіўся 12 студзеня 1981 году. Як вынікала зь ягонага аповеду, яго сем разоў судзілі за крадзяжы, апошні раз ён, імаверна, сядзеў у Расеі, яго забралі ў расейскае войска з калёніі. У палон беларус трапіў пад Тарэцкам у Данецкай вобласьці празь сем дзён пасьля таго, як пачаў ваяваць.
- Андрэй Лапатнёў зь Віцебску меў праблемы з законам праз наркотыкі, і, каб унікнуць перасьледу, вырашыў зьехаць праз Расею ў Польшчу. У Маскве яго затрымалі і прымусілі падпісаць кантракт зь Міністэрствам абароны Расеі. 2 красавіка 2024 году ён падпісаў кантракт на службу ў 123-й мотастралковай брыгадзе і падаў заяву на расейскае грамадзянства. У пачатку сакавіка трапіў ва ўкраінскі палон таксама ў Данецкай вобласьці.
- Артур Яфрэмаў паходзіць з Касьцюковічаў Магілёўскай вобласьці, чатыры разы суджаны за крадзяжы. Апошні раз быў затрыманы ў Расеі. Трапіў ва ўкраінскі палон у сьнежні 2024 году, імаверна, пад Купянскам Харкаўскай вобласьці.
- Міхаіл Шалгун родам з Ушацкага раёну Віцебскай вобласьці, ён нарадзіўся 10 сакавіка 1974 году, ваяваў у штурмавым палку, служыў кантрактнікам у палявой частцы, прыпісанай да Каменкі Ленінградзкай вобласьці. Чатыры разы асуджаны за хуліганства, разбойны напад і крадзяжы. Да адпраўкі ва Ўкраіну праходзіў рыхтаваньне ў Белгарадзкай вобласьці. Абвестку аб яго пошуках апублікавалі сёлета ў лютым у расейскай сацыяльнай сетцы «ВКонтакте»..
- Мікалай Жураўлёў нарадзіўся 27 траўня 1982 году. Ягонага імя бракуе ў раней апублікаваных сьпісах беларусаў, якія ваююць на баку Расеі супраць Украіны. Згодна з інфармацыяй «Кібэрпартызанаў», Мікалай нарадзіўся пад Віцебскам. Пасьведчаньне аб нараджэньні яму выдалі ў Бабініцкім сельскім савеце, а пашпарт — у 1999 годзе ў Віцебскім РАУС. Хутчэй за ўсё нежанаты, бо зьвестак пра шлюб на 2021 год у дакумэнтах няма. Мае сярэднюю спэцыяльную адукацыю — у 2005 годзе скончыў ПТВ-57. Працаваў на розных будаўнічых і сельскагаспадарчых прадпрыемствах, на Смаленскім рынку ў Віцебску. З 2011 па 2013 год быў беспрацоўным. У 2013 годзе працаваў у віцебскіх папраўчай калёніі № 3 і ў лячэбна-працоўным прафілякторыі № 4. Ад 2014 году значыцца зноў беспрацоўным. Ніякіх зьвестак пра ягоную актыўнасьць у Беларусі, пачынаючы з 2014 году, няма.
- Сяргей Кузьменка нарадзіўся 22 ліпеня 1971 году. Да кантракту з расейскай арміяй жыў у расейскім горадзе Яраслаўлі. Ваяваў стралком у другім батальёне 102-га мотастралковага полку 150-й дывізіі. Хоць жыў у Расеі, меў беларускі пашпарт. У Беларусі жыве ягоная 81-гадовая маці Лідзія Кузьменка. Дэталі падпісаньня ягонага кантракту з расейскай арміяй невядомыя.
- Віктар Азямблоўскі нарадзіўся 20 ліпеня 1977 у Менску. Падпісаў кантракт з расейскай арміяй 15 траўня 2025 году. Мае 25-гадовага сына, з жонкай разышоўся. Суджаны за крадзяжы, нясплату алімэнтаў, ухіленьне ад адбыцьця пакараньня і за парушэньне правілаў знаходжаньня ў папраўчых установах.
- Уладзіслаў Карлоўскі нарадзіўся 11 верасьня 2001 году ў Дзяржынску. Падпісаў кантракт з расейскай арміяй ў ліпені 2025 году. Яго судзілі за шмат эпізодаў збыту псыхатропаў у складзе арганізаванай групы.
- Руслан Купрацэвіч нарадзіўся 31 кастрычніка ў пасёлку Чырвоны Гомельскага раёну. Пачаў ваяваць супраць Украіны на баку Расеі ў ліпені 2025 году.
- Павал Пецюлевіч нарадзіўся 7 чэрвеня 1999 году, паходзіць з Ашмянаў Горадзенскай вобласьці. Ваяваў у складзе 36-га мотастралковага палку Сухапутных войскаў Расеі, створанага ў 2023 годзе адмыслова для ўдзелу ў вайне супраць Украіны. Трапіў у палон пры выкананьні свайго першага баявога заданьня. Зьвярнуўся да Аляксандра Лукашэнкі па дапамогу ў вызваленьні з украінскага палону і назваў падпісаньне кантракту з расейскай арміяй «няправільным рашэньнем».
- Юры Шарко нарадзіўся 29 сьнежня 1987 году, паходзіць з Воранава Горадзенскай вобласьці. На вайну трапіў з Масквы, куды зьехаў на заробкі. Абставіны, у якіх ён падпісаў кантракт з расейскім войскам, пакуль невядомыя. Ваяваў у складзе 82-га мотастралковага полку, які ўваходзіць у склад 69-й гвардзейскай Краснасельскай дывізіі 6-й агульнавайсковай арміі Расеі.
- Руслан Гудач нарадзіўся 19 лістапада 1985 году, паходзіць зь вёскі Ганэлькі Шчучынскага раёну Горадзенскай вобласьці. Як ён расказаў украінскім вайскоўцам, меў невялікі бізнэс у Беларусі, але трапіў у поле зроку падатковых органаў.
Колькі беларусаў у расейскім палоне
У расейскім палоне, імаверна, знаходзяцца двое грамадзян Беларусі:
- Ян Дзюрбейка,
- Сяргей Дзёгцеў.
Яны ваявалі ў складзе палку Кастуся Каліноўскага і трапілі ў палон пасьля бою пад Лісічанскам 26 чэрвеня 2022 году. Але з таго моманту так і не ўдалося знайсьці інфармацыі аб дакладным месцы іх знаходжаньня.
Форум