Ва ўкраінскім дзяржаўным праекце «Хачу жыць» паведамілі пра гібель яшчэ чатырох грамадзян Беларусі, якія ваявалі на баку Расеі супраць Украіны. Але ня ўсе яны мелі беларускі пашпарт паводле нараджэньня і паходжаньня.
Сярод загінулых — Сяргей Ёсіфавіч Старынскі, нарадзіўся 27 сакавіка 1969 году, служыў шараговым у 32 асобнай мотастралковай брыгадзе (вайсковая частка 52892), быў памочнікам гранатамётніка. Загінуў 4 студзеня 2024 году.
Сяргей Аляксандравіч Краўчанка (нарадзіўся 17 сакавіка 1976 году, служыў малодшым сяржантам, быў гранатамётчыкам, загінуў 7 сьнежня 2024 году), Дзьмітры Анатолевіч Татарынчык (нарадзіўся 8 сакавіка 1974 году, стралок-памочнік гранатамётніка, загінуў 20 красавіка 2024 году) і Іван Мікалаевіч Кірдзяшкін (нарадзіўся 19 лістапада 1962 году, служыў у званьні яфрэйтара, загінуў 11 лістапада 2024 году) служылі ў 114-й асобнай мотастралковай брыгадзе.
Паводле праекту «Хачу жыць», 114 мотастралковая брыгада — адзін з найбольш «крывавых» падразьдзелаў расейскай арміі.
«Падразьдзел створаны з данецкай бандыцкай групоўкі „Ўсход“ пад камандаваньнем Аляксандра Хадакоўскага, былога камандзіра „Альфы“ СБУ ў Данецкай вобласьці. Праз жорсткае стаўленьне і адпраўку ў мясныя штурмы ягоных салдатаў у асяродзьдзі вайскоўцаў гуляе байка, што „ДНРаўскае“ камандаваньне брыгады працуе на Ўкраіну і дапамагае ўтылізаваць сваіх салдатаў», — адзначылі ва ўкраінскім праекце.
Апроч вялікіх баявых стратаў, брыгада вядомая жорсткім стаўленьнем да байцоў — іх кідаюць у «ямы» і «клеткі» і патрабуюць плаціць за невялікія парушэньні.
Што вядома пра загінулых
Грамадзянін Беларусі Іван Кірдзяшкін, які ваяваў на баку Расеі і загінуў ва Ўкраіне. Фота з пашпартнай базы, нададзенае ініцыятывай «Кібэрпартызаны».
У беларускай супольнасьці «Кібэрпартызаны» Свабодзе паведамілі, што Іван Мікалаевіч Кірдзяшкін набыў беларускае грамадзянства прыкладна ў 2009 годзе. Ён нарадзіўся ў Расеі, у пасёлку гарадзкога тыпу Тарбеева ў Рэспубліцы Мардовія. У Беларусі жыў у вёсцы Вераб’і каля Глыбокага, працаваў на глыбоцкай птушкафабрыцы, а таксама на прадпрыемствах «Віцебскаблгаз» і «Мэліявадгас». У 2021-м ён працаваў на сельскагаспадарчым прадпрыемстве «Мярэцкія», прынамсі да сярэдзіны 2021 году суджаны ня быў.
Зьвестак пра Дзьмітрыя Татарынчыка і Сяргея Краўчанку ў базе «Кібэрпартызанаў» няма. Прадстаўнікі супольнасьці не выключаюць, што яны таксама маглі набыць беларускае грамадзянства пасьля 2021 году або што іх пэрсанальныя зьвесткі, дадзеныя ўкраінскім бокам, з памылкамі. Зьвесткі пра Сяргея Старынскага пакуль правяраюць.
Яшчэ адзін беларус — Ігар Антонавіч Сакалоўскі — здаўся ва ўкраінскі палон. Як паведамілі ў міжнародным праекце «НЕ ЖДИ меня из Украины», ён нарадзіўся 23 чэрвеня 1994 году, служыў у 82-м мотастралковым палку Ўзброеных сілаў Расеі.
У інтэрвію ўкраінскім журналістам ён паведаміў, што падпісаў кантракт у часе знаходжаньня ў сьледчым ізалятары ў Расеі.
«Мне пагражала дэпартацыя, я ўжо сядзеў у дэпартацыйнай камэры. Мне паабяцалі: „год там па „птушках“ (так называюць баявыя дроны. — РС) пастраляеш і пойдзеш дадому“. Праз тры месяцы паабяцалі адпачынак, але ніякіх адпачынкаў не давалі. Сказалі: ты — беларус, табе нічога ня трэба, ні адпачынку, ні ўзнагародаў», — сказаў ён.
Паводле яго, пасьля падпісаньня кантракту яго адправілі ў Ваўчанск Харкаўскай вобласьці. На гэтым кірунку ён ваяваў 21 дзень і бачыў шмат целаў загінулых расейскіх вайскоўцаў. Ігар Сакалоўскі сьцьвярджае, што яму ня раз пагражалі расстрэлам і патрабавалі плаціць грошы за неадпраўку на штурмы.
Беларус кажа, што ён плаціў грошы, а калі грошай не засталося, то яго пасадзілі ў хлеў, і, такім чынам, ён знаходзіўся «ў палоне» сваіх жа салдатаў. Ігар Сакалоўскі таксама паведаміў, што ягоная маці, якая жыве ў Беларусі, пасьпела напісаць скаргу пракурору, але не ўдакладніў, пракурору якой краіны — Беларусі ці Расеі, і паводле якога факту — падпісаньня кантракту або вымагальніцтва грошай.
«Я ня буду прыхоўваць, я сам здаўся ў палон, бо мяне адправілі на забой, забралі пашпарт і вайсковы квіток», — сказаў Ігар Сакалоўскі. Ён не ўдакладніў, што ён рабіў у Расеі перад заключэньнем кантракту з расейскай арміяй і дзе жыў у Беларусі да сваёй паездкі ў Расею.
Ігар Сакалоўскі стаў дзявятым беларусам, які цяпер знаходзіцца ва ўкраінскім палоне.
У межах вялікага абмену з Расеяй Украіна перадала сёлета чатырох палонных беларусаў, якія ваявалі ў расейскай арміі.
Форум