Паводле закону, людзі, якія зьдзейсьнілі злачынствы, прызнаныя экстрэмісцкімі, страчваюць права працаваць у адукацыі і ў іншых сфэрах, дзе дзейнасьць зьвязаная зь дзецьмі. Праз коску з экстрэмістамі ідуць злачынцы, зьвязаныя з незаконным абаротам наркотыкаў.
Таксама закон прадугледжвае правядзеньне псыхалягічнага сумоўя — як для тых, хто толькі плянуе працаваць з дзецьмі, так і для ўжо дзеючых супрацоўнікаў. Парадак і ўмовы такіх сумоўяў будзе вызначаць урад.
Сярод іншых нормаў, якія ўступілі ў сілу, — абавязак бацькоў абараняць дзяцей ад шкоднай інфармацыі ў інтэрнэце, забарона на распаўсюд цацак без узроставых маркіровак (калі яны зьвязаныя з гульнямі або фільмамі), а таксама дадатковыя гарантыі для дзяцей-сіротаў у сфэры мэдычнага забесьпячэньня.
- У Беларусі экстрэмізмам прызнаюць дзейнасьць, накіраваную на гвалтоўную зьмену ладу, захоп улады, распальваньне варожасьці, а таксама дзеяньні з выкарыстаньнем экстрэмісцкіх матэрыялаў, абразы дзяржаўных органаў, сымболікі, распаўсюджваньне ілжывых зьвестак аб краіне, перашкоду працы дзяржаўных органаў, у тым ліку ЦВК. Да гэтага прыраўноўваюцца таксама злачынствы, «учыненыя па матывах варожасьці», такія як хуліганства, зьдзек над сымбалямі, супраціў міліцыі, а таксама распаўсюджваньне пэрсанальных дадзеных. Да «экстрэмістаў» у Беларусі адносяць людзей, асуджаных па шырокім коле артыкулаў, нават калі яны не зьвязаныя зь відавочнымі заклікамі да гвалту.
Форум