Прэзыдэнт Літвы Гітанас Наўседа выказаўся наконт гэтага ў інтэрвію інфармагенцтву BNS, апублікаваным 12 студзеня.
На пытаньне, ці магла б Літва ў выпадку ціску партнэраў аднавіць транзыт у абмен на павелічэньне ў краіне вайсковага кантынгенту ЗША або пры ўмове, што прыбытак наўпрост ішоў бы ў абаронны бюджэт, Наўседа адказаў, што не гатовы на гэта пайсьці.
«Для мяне каштоўнасная палітыка — не пустое паняцьце і не пустое слова. Таму гандляваць каштоўнасьцямі — для мяне абсалютна непрымальна», — падкрэсьліў кіраўнік літоўскай дзяржавы.
Паводле яго слоў, любыя развагі аб тым, што Вільня магла б «нешта прадаць у абмен на больш гнуткую пазыцыю па пытаньні беларускіх угнаеньняў, зьяўляюцца прынцыпова непрымальнымі». Наўседа падкрэсьліў, што такая палітыка і Эўрапейскага зьвязу.
Літоўскі прэзыдэнт назваў сябе «адным з самых актыўных прыхільнікаў санкцыянаваньня беларускіх угнаеньняў ва ўсіх фарматах — у Эўрапейскай радзе і ў іншых месцах».
«Цяпер я якраз абмяркоўваю гэта з кіраўнікамі суседніх краін — і з прэм’ер-міністрам Польшчы, і з прэмʼер-міністрам Латвіі. Учора мы гаварылі аб гэтым з канцлерам Нямеччыны Фрыдрыхам Мэрцам. Я спытаўся ў яго меркаваньне і аб тым, як падзеі могуць разьвівацца далей. У любым выпадку пазыцыя Літвы застаецца вельмі цьвёрдай.
Мэрц, паводле яго слоў, разумее пазыцыю Літвы і мэтазгоднасьць санкцый, якія прымяняюцца ў дачыненьні да Беларусі, а таксама «заўсёды іх падтрымліваў».
Наўседа выказаў надзею, што падчас размоваў з партнэрамі «ўдасца сфарміраваць вельмі моцную кааліцыю, якая скажа экспарту беларускіх угнаеньняў праз літоўскія парты дакладнае «не».
Літва забараніла транзыт беларускіх угнаеньняў у пачатку 2022 года, абапіраючыся на санкцыі ЗША, паколькі ЭЗ увёў адпаведныя абмежаваньні пазьней.
13 сьнежня пасьля перамоваў у Менску спэцыяльнага пасланьніка прэзыдэнта ЗША па Беларусі Джона Коўла і Аляксандра Лукашэнкі было вызвалена і вывезена з краіны 123 палітвязьні. Амэрыканскі дыплямат заявіў, што ЗША па ўказаньні прэзыдэнта Дональда Трампа здымаюць санкцыі з беларускіх калійных угнаеньняў.
15 сьнежня Ўпраўленьне па кантролі за фінансавымі актывамі Міністэрства фінансаў ЗША (OFAC) апублікавала агульную ліцэнзію, якая дазваляе правядзеньне апэрацый з ААТ «Беларуськалій» і ААТ «Беларуская калійная кампанія» (БКК).
Наўседа 30 сьнежня абверг інфармацыю аб тым, што ЗША пасьля зьняцьця сваіх санкцый з беларускіх калійных угнаеньняў аказвае ціск на Літву, каб заахвоціць яе дазволіць транзыт гэтай прадукцыі з наступнай адгрузкай у порце Клайпеды.
Форум