Новая Дзяржаўная інвэстыцыйная праграма прадугледжвае фінансаваньне інфраструктуры для электразабесьпячэньня тэхнічных сродкаў аховы Дзяржаўнай мяжы, заўважыў «Флагшток». У дакумэнце не пазначана, пра якую частку мяжы ідзе гаворка, але напісана, што гэта праект Мінэнэрга «на ўзгадненьне зь Берасьцейскім і Гомельскім аблвыканкамамі», з чаго вынікае, што ў праекце заплянаванае пераабсталяваньне мяжы з Украінай.
На стварэньне інфраструктуры для электразабесьпячэньня тэхнічных сродкаў аховы дзяржаўнай мяжы ў 2026 годзе выдзяляецца 2 млн 800 тыс. рублёў (амаль 950 тыс. даляраў) за кошт сродкаў дзяржаўнага мэтавага бюджэтнага фонду нацыянальнага разьвіцьця.
Тэрмін рэалізацыі праекту: 2025–2028 гг. Асноўныя працы заплянаваныя на 2027 год, калі прагназуецца значнае павелічэньне фінансаваньня — да 66 млн руб. На 2028 год прадугледжваецца выдзяленьне 3 млн руб.
Пералік аб’ектаў у рамках гэтай праграмы вызначаецца Дзяржаўным памежным камітэтам Беларусі.
Канкрэтыка пакуль не вядомая, адзначае выданьне, якое вывучала дакумэнт. Дзяржзакупкі ў межах праекту яшчэ не абвясьцілі. Але пра пляны можна меркаваць па ўжо рэалізаваных праектах на іншых участках мяжы. Верагодна, размова ідзе пра сыстэму, якую ўводзяць у эксплюатацыю на заходняй мяжы.
Напрыклад, у Берасьці аб’яўлялі дзяржзакупку па аснашчэньні ўчастку мяжы валаконна-аптычнай сыгналізацыйнай сыстэмай аховы.
На гэты момант сотні кілямэтраў мяжы з Украінай застаюцца абсталяванымі па стандартах XX стагодзьдзя, але мадэрнізацыю некаторых участкаў у Берасьцейскай вобласьці ўжо пачалі з узьвядзеньня «разумных сыгналізацыйных комплексаў». Яны аснашчаныя валаконна-аптычнымі чуйнікамі і камэрамі відэаназіраньня з уманціраванымі цеплавізарамі. Становішча за маніторам кампутара адсочвае апэратар, якога сыстэма апавяшчае аб набліжэньні патэнцыйнага парушальніка.
Форум