Мікалая Аўтуховіча затрымалі 1 сьнежня 2020 году. Шосты раз за час цяперашняга тэрміну зьняволеньня прадпрымальнік і праваабаронца адзначае дзень народзінаў за кратамі (ня лічачы двух тэрмінаў у 3 і 5 гадоў, адбытых у другой палове 2000-х і 2010-х гадах).
Але сваякам палітвязьня дакладна невядома, дзе ён цяпер. Летась у сьнежні Аўтуховіча мусілі перавесьці з горадзенскай турмы ў калёнію, ён пасьпеў паведаміць сваякам, што рыхтуецца да этапу, але не ўдакладніў, куды яго накіруюць. Крыніца, дасьведчаная ў справах Мікалая Аўтуховіча, расказала Свабодзе, што лістоў ад яго з новага месца ўтрыманьня дагэтуль не было.
Пра ранейшыя справы і стан здароўя Мікалая Аўтуховіча крыніца ведае толькі зь ліста, напісанага ў лістападзе.
«Апошні раз яшчэ з горадзенскай турмы напісаў, што ў яго ўсё па-ранейшаму, ні на што ня скардзіўся, прасіў не перажываць за яго», — падзялілася зьвесткамі крыніца.
Крыху новай інфармацыі пра Мікалая Аўтуховіча дадаў былы палітвязень Павал Севярынец, які адбываў тэрмін у той жа горадзенскай турме, адкуль вызваліўся 13 сьнежня. Паводле Паўла Севярынца, Аўтуховіч у турме «трымаўся як крэмень».
«Ён трымаецца вельмі добра. Для Аўтуховіча ў турме спэцыяльныя ўмовы, ён у асобнай камэры, у адзіночцы. Наколькі я магу меркаваць, ён, дзякуй Богу, жывы і ў бадзёрым стане. Што зь ягоным здароўем, дакладна ня ведаю. Міколу Аўтуховіча прызнаюць легендай і іншыя вязьні, нават тыя, хто супрацоўнічае з адміністрацыяй... Ён трымаецца там як крэмень», — сказаў Павал Севярынец у размове з Радыё Свабода 5 студзеня.
На момант інтэрвію Севярынец таксама ня ведаў, куды перавялі для далейшага адбыцьця пакараньня Мікалая Аўтуховіча.
Мікалай Аўтуховіч асуджаны на 25 гадоў паводле 10 артыкулаў Крымінальнага кодэксу, уключна з такімі цяжкімі, як 289 — «акт тэрарызму» і 357 — «змова з мэтай захопу ўлады неканстытуцыйным шляхам», за якія прадугледжана нават сьмяротнае пакараньне.
Для Аўтуховіча гэта трэці тэрмін зьняволеньня ў ягоным жыцьці, таму паводле беларускіх законаў яго маюць утрымліваць у калёніях для рэцыдывістаў з строгім альбо асаблівым рэжымам. Такіх калёніяў у краіне некалькі.
Форум