Урад Каба-Вэрдэ з 1 студзеня 2025 году адмовіўся ад спрошчанай візавай палітыкі з 96 краінамі сьвету.
Як адзначаецца на афіцыйным партале EASE (Efficient Automatic and Safe Entry of Travellers), цяпер грамадзяне гэтых краін для ўезду ў Каба-Вэрдэ павінны загадзя атрымаць візу ў дыпляматычных установах гэтай краіны.
З краін СНД у сьпіс трапілі Беларусь, Азэрбайджан, Армэнія, Таджыкістан, Туркмэністан, Узбэкістан. Таксама спрошчаная візавая палітыка ня будзе дзейнічаць для грамадзян краін, у якіх адбываюцца вайсковыя канфлікты (Сырыя, М’янма, Палестына, Судан і іншыя), а таксама дыктатураў (Іран, Ірак, Паўночная Карэя, Вэнэсуэла й іншыя).
Для грамадзян Беларусі, якія маюць дзейны дазвол на жыхарства ў краінах Эўразьвязу, застаецца спрошчаны парадак атрыманьня дазволу на ўезд.
У Беларусі няма дыпляматычнага прадстаўніцтва Каба-Вэрдэ. Найбліжэйшае, празь якое можна атрымаць візу, месьціцца ў Нямеччыне. Амбасада Каба-Вэрдэ ёсьць і ў Расеі, але там няма візавага аддзелу, бо для грамадзян Расеі дзейнічае бязьвізавы рэжым — яны могуць знаходзіцца ў гэтай краіне бязь візы цягам 60 дзён.
Каба-Вэрдэ разьмешчана на вульканічным архіпэлягу за некалькі сотняў кілямэтраў ад паўночна-заходняга ўзьбярэжжа Афрыкі. Краіна вядомая сваёй крэольскай культурай, якая спалучае партугальскія і афрыканскія традыцыі, народнай музыкай і шматлікімі пляжамі. Сталіца — горад Прая — знаходзіцца на найбуйнейшым востраве Каба-Вэрдэ.
Форум