Што адбываецца ў Вэнэсуэле і за яе межамі пасьля ўдару ЗША па Каракасе і затрыманьня Мадура. ФОТА

Празь некалькі гадзін пасьля ўдару прэзыдэнт ЗША Дональд Трамп заявіў аб затрыманьні вэнэсуэльскага лідэра Нікаляса Мадура і ягонай жонкі. Іх будуць судзіць у Нью-Ёрку паводле абвінавачаньняў у карупцыі, незаконным абарачэньні наркотыкаў і іншых злачынствах.

Амэрыканская апэрацыя працягвалася ўсяго 30 хвілін, але інфармацыя аб тым, што адбываецца ў Вэнэсуэле доўгі час адсутнічала.

Што будзе далей у Вэнэсуэле, пакуль незразумела, але ўдары ЗША і захоп Мадура ўжо рэзка асудзілі некаторыя з наймацнейшых партнэраў Каракаса.

Нягледзячы на тое, што Мадура быў захоплены, яго ўрад усё яшчэ знаходзіцца ва ўладзе. Міністар абароны Вэнэсуэлы Ўладзімір Падрына паабяцаў супраціўляцца ўмяшаньню ЗША, і ў краіне абвясьцілі надзвычайнае становішча.

Згодна з Канстытуцыяй, цяпер краінай кіруе віцэ-прэзыдэнтка Дэлсі Радрыгес, хоць ЗША і апазыцыя Вэнэсуэлы лічаць галасаваньне 2024 году, на якім яна была абраная, сфальсыфікаваным.

Лідар апазіцыі Марыя Карына Мачада пазыцыянавала сябе як магчымую замену, якую падтрымае Захад, але значная частка палітычных апанэнтаў Мадура не падтрымлівае ўмяшаньне ЗША.

У заяве, апублікаванай на плятформе X, Марыя Карына Мачада заявіла, што Мадура сутыкнецца з «міжнародным правасудзьдзем за жахлівыя злачынствы, учыненыя супраць вэнэсуэльцаў», і заклікала неадкладна прызнаць саюзьніка апазыцыі Эдмунда Гансалеса пераходным лідэрам краіны.

У інтэрвію Fox News Трамп заявіў, што Вашынгтон цяпер вырашае, што будзе далей з Вэнэсуэлай.

«Мы ня можам рызыкаваць, дазваляючы камусьці іншаму кіраваць гэтым і проста ўзяць на сябе тое, што пакінуў [Мадура]. Таму мы прымаем гэтае рашэньне зараз», – сказаў Трамп. «Мы будзем вельмі актыўна ўдзельнічаць у гэтым».

Ён таксама сказаў, што Злучаныя Штаты будуць «вельмі актыўна ўдзельнічаць» у нафтавай прамысловасьці Вэнэсуэлы.

Некаторыя чальцы Кангрэсу не падтрымалі дзеяньні амэрыканскіх вайскоўцаў у Каракасе.

Неўзабаве пасьля пачатку ўдараў сэнатар-дэмакрат Рубэн Гальёга з Арызоны напісаў на плятформе X: «Гэтая вайна незаконная».

У той жа час многія рэспубліканцы высока ацанілі дзеяньні адміністрацыі Трампа ў Вэнэсуэле, хоць, паводле дэмакратаў, адміністрацыя павінна была паведаміць Кангрэсу загадзя аб апэрацыі, згодна з законам аб ваенных паўнамоцтвах. Гэты закон ЗША прызначаны для абмежаваньня магчымасьці прэзыдэнта накіроўваць войскі ў канфлікт без адабрэньня Кангрэса.