«Сёньня маё сэрца з народам Вэнэсуэлы», — напісала Сьвятлана Ціханоўская на сваёй старонцы на плятформе Х.
«Я спадзяюся, што нядаўнія падзеі прынясуць справядлівасьць, свабоду і вяршэнства закону, якія вэнэсуэльцы даўно заслужылі і за якія адважна змагаліся. Дыктатары ня вечныя — і сёньня, падобна, нелегітымны Лукашэнка страціў яшчэ аднаго блізкага сябра», — падкрэсьліла яна.
Намесьнік кіраўніцы Аб’яднанага пераходнага кабінэту, кіраўнік Народнага антыкрызіснага ўпраўленьня (НАУ) Павал Латушка заявіў, што ўлады Беларусі павіны зрабіць высновы з сытуацыі, якая цяпер склалася вакол Вэнэсуэлы.
«Калі няма дыялёгу з грамадзтвам і падтрымкі народу, канец улады заўсёды нечаканы і жорсткі. Адзіны сцэнар для атачэньня Лукашэнкі — ужо цяпер зрабіць усё неабходнае для зьменаў у Беларусі мірным шляхам — круглы стол. Час працуе супраць дыктатуры», — падкрэсьліў Павал Латушка.
У ноч на 3 студзеня ЗША нанесьлі ўдары па аб’ектах на тэрыторыі Вэнэсуэлы. Празь некалькі гадзін пасьля ўдару прэзыдэнт ЗША Дональд Трамп заявіў аб затрыманьні вэнэсуэльскага лідэра Нікаляса Мадура разам зь ягонай жонкай і іх вывазе з Вэнэсуэлы.
Пазьней генэральны пракурор ЗША Пэм Бондзі заявіла, што Мадуры і ягонай жонцы Сілія Флорэс выставілі абвінавачаньні ў Паўднёвай акрузе Нью-Ёрка ў карупцыі, незаконным абарачэньні наркотыкаў і іншых злачынствах. У 2020 годзе Дзяржаўны дэпартамэнт абвясьціў аб узнагародзе ў 50 мільёнаў даляраў за інфармацыю, якая дапаможа яго арыштаваць і засудзіць.
Форум