У сваім выступе Аляксандар Лукашэнка заявіў, што эканоміка краіны стабільная: пазыковая нагрузка падае, золатавалютныя рэзэрвы на гістарычным максымуме. Ён скрытыкаваў плян адраджэньня дэмакратычных сілаў. Паводле яго, гэты плян — гэта наўпроставая здача сувэрэнітэту і перадача краіны пад замежнае кіраваньне.
Прамоўца паведаміў, што Беларусь выбудоўвае канструктыўны дыялёг з ЗША — адным з галоўных цэнтраў сілы, пры гэтым захоўваючы бліскучыя стратэгічныя адносіны з Расеяй і Кітаем.
Паводле Лукашэнкі, нават амэрыканцы ніколі не патрабавалі ад яго зламаць беларускую мадэль сацыяльна-эканамічнага разьвіцьця, «яны бачаць вынік: чыстыя гарады, добрыя дарогі, нармальнае жыцьцё».
Пра перамовы з ЗША ён сказаў: «Дыялёг часам жорсткі і ўпарты. Але гэта перамовы моцнага з моцным. Павага і аўтарытэт нашай краіны не ставіцца пад сумнеў. І мы цьвёрда стаім на сваіх пазыцыях».
Зьвяртаючыся да апазыцыі, Лукашэнка сказаў: «Нідзе вы больш не пераможаце. Мы будзем вас бамбіць у інфармацыйнай сфэры, пакуль Эйсмант жывы (Іван Эйсман — старшыня Дзяржтэлерадыё кампаніі — РС)»
Таксама ён пракамэнтаваў вызваленьне палітвязьняў: «Калі я кагосьці адпусьціў у Літву, Польшчу і на поўдзень, не пераймайцеся. Гэта мае паўнамоцтвы. Калі я ў нечым ня маю рацыі, дык неўзабаве выбары. «Адмарозка», чыя жонка сядзіць зь дзецьмі ў Літве. я выпусьціў. Узьядналіся сям'ёй. Але вы ж бачыце, што адбываецца. Кажуць, што я падмануў. Але я зрабіў, аб чым мяне прасілі. Кажуць, што Бабарыка і Калесьнікава ствараюць цэнтар у Нямеччыне. Я зрабіў тое, аб чым мяне прасілі».
Слова ўзяў таксама Юры Васкрасенскі, былы супрацоўнік штабу выпушчанага нядаўна на волю Віктара Бабарыкі. Было адзначана, што ў адным лісьце зьмяшчалася просьба пакінуць вызваленых палітвязьняў на волі. Але нібы Лукашэнка адмовіў.
Такама Васкрасенскі прапанаваў не выпускаць журналіста Анджэя Пачобута, пакуль у краіну не прыедуць Дональд Туск і Радэк Сікорскі.
Лукашэнка мяркуе, што Эўразьвяз можа абрынуцца як адна з апораў усясьветнага парадку праз унутраную нестабільнасьць і гістэрычную палітыку:
«У сьвеце застаюцца тры-чатыры палюсы сілы: ЗША, Кітай, Расея, магчыма Індыя» — сказаў ён.
Таксама ён паведаміў, што ракетны комплекс «Арэшнік» ужо з 17 сьнежня заступіў на баявое дяжурства.
«У нас адна апора нашага сувэрэнітэту — гэта блізкі нам народ, расейцы. Калі б не было Расеі і Кітая, нам складана было б. У Эўропе газ па 500 даляраў, а ў нас — 120 даляраў».
У першы дзень Аляксандар Лукашэнка зьвярнуўся з пасланьнем да беларускага народу і парлямэнту, а ў другі дзень плянуюць разгледзець і зацьвердзіць праграму сацыяльна-эканамічнага разьвіцьця Беларусі 2026-2030 гады, якую раней зацьвердзіў Савет міністраў Беларусі.
Дэлегаты павінны выбраць новага чальца прэзыдыюму УНС замест Канстанціна Бурака, які ў красавіку 2025 году стаў памочнікам Лукашэнкі–інспэктарам па Горадзенскай вобласьці. Анансавалі таксама, што на сходзе разгледзяць кадравыя пытаньні Канстытуцыйнага і Вярхоўнага судоў, а таксама пытаньні, зьвязаныя зь фінансаваньнем УНС.
Перад сходам улады паведамлялі, што ў ім возьмуць удзел 1200 дэлегатаў. Паводле Міністэрства інфармацыі Беларусі, высьвятляць работу УНС будуць 454 прадстаўнікі СМІ – 356 ад 23 беларускіх і 39 – ад 12 «вядучых міжнародных» СМІ. У ведамстве перакананы, што такая колькасьць журналістаў дазволіць забясьпечыць «максымальна поўную і аб’ектыўную карціну» другога пасяджэньня VII Усебеларускага народнага сходу.
Форум