Пра гэта паведаміў начальнік дэпартамэнту міжнароднага вайсковага супрацоўніцтва Мінабароны Беларусі, памочнік міністра па міжнародным вайсковым супрацоўніцтве Валеры Равенка.
«Праца ў Менску дэлегацыі Генэральнага штаба Ірану завяршылася падпісаньнем пляна двухбаковага супрацоўніцтва на 2026 год. У якасьці галоўнай падзеі разглядаецца правядзеньне сумесных вучэньняў на тэрыторыі адной зь дзяржаў», – напісаў Равенка ў сацсетцы X.
Дэлегацыя Генэральнага штабу Ірана прыбыла ў Менск 8 сьнежня для абмеркавання супрацы у рамках двухбаковага вайсковага супрацоўніцтва.
Прыярытэт надаецца «падрыхтоўцы войскаў, адукацыі і вайскова-тэхнічным аспэктам узаемадзеяньня», – заявіў Равенка.
Плян супрацоўніцтва на наступны год прадугледжвае далейшае разьвіцьцё супрацоўніцтва дзьвюх краін у галіне абароны. Паводле афіцыйных крыніц, асаблівая ўвага была нададзеная пэрспэктывам актывізацыі сумеснай працы ў сфэрах падрыхтоўкі кадраў, абмену досьведам, навукова-тэхнічнага ўзаемадзеяньня.
Аляксандар Лукашэнка ў жніўні на сустрэчы з прэзыдэнтам Ірану Масудам Пэзэшкіянам назваў нанясеньне ўдараў па ядзернай інфраструктуры Ірану, якая знаходзіцца пад кантролем МАГАТЭ, «сур’ёзнаю пагрозаю рэгіянальнай і міжнароднай стабільнасьці і бясьпецы».
У сваю чаргу ў заяве для прэсы прэзыдэнт Ірану Масуд Пэзэшкіян адзначыў, што разам зь Беларусьсю можна змагацца супраць «аднапалярнага сьвету», і запрасіў Лукашэнку наведаць Іран зь візытам у любы час.
На перамовах бакі дамовіліся падрыхтаваць і падпісаць пагадненьне аб стратэгічнай супрацы.
