Улады Сумскай вобласьці паведамілі, што ў выніку расейскіх абстрэлаў у Краснапольскай грамадзе рэгіёну загінула сям’я з чатырох чалавек — двое дзяцей 6 і 4 гадоў і іхныя бацькі — 35-гадовы бацька і 26-гадовая маці.
Згодна з паведамленьнем, за апошнія содні расейцы ўчынілі 54 абстрэлы 23 населеных пунктаў. Увогуле ў вобласьці загінулі пяць чалавек і адзін атрымаў раненьні. Расейцы прыцэльна білі зь зьнішчальнікаў і артылерыі па жылых кварталах і аб’ектах цывільнай інфраструктуры.
«Паветраная трывога ў вобласьці працягвалася 17 гадзін 9 хвілін», — паведамілі абласныя ўлады.
У Херсонскай вобласьці, якая таксама цярпіць ад штодзённых абстрэлаў з авіяцыі, артылерыі і дронамі, пацярпелі 29 паселішчаў, адзін чалавек загінуў, чатыры параненыя.
Паводле абласных уладаў, расейцы таксама цэлілі ў крытычную і сацыяльную інфраструктуру, жылы сэктар. У выніку ўдараў пашкоджаныя царква, адміністрацыйнае памяшканьне, музэй і газаправод. Выцек газу змаглі перакрыць, што дазволіла перадухіліць моцны пажар.
У Браварскім раёне Кіеўскай вобласьці ў выніку пацэльваньня расейскага дрону пацярпеў адзін чалавек. Пашкоджаны прыватны дом, гаспадарчыя памяшканьні і аўтамабіль.
У Валгаградзкай вобласьці Расеі некалькі населеных пунктаў без электраэнэргіі
Улады Валгаградзкай вобласьці Расеі заявілі аб інтэнсіўнай атацы дронамі, якую адбілі сілы супрацьпаветранай абароны.
«У выніку падзеньня аскепкаў БПЛА на мяжы Валгаграду зафіксавалі два вялікія ўзгараньні сухой травы, якія апэратыўна зьліквідавалі супрацьпажарныя сілы. У Сьветлаярскім раёне парушана энэргазабесьпячэньне трох населеных пунктаў, на лініі электраперадач працуюць рамонтныя брыгады. Папярэдне, пашкоджаньня будынкаў і пацярпелых няма», — адзначаецца ў паведамленьні мясцовай улады.
Зяленскі: у выніку контранаступу ад расейцаў вызвалілі 174 квадратныя кілямэтры
Прэзыдэнт Украіны Ўладзімір Зяленскі заявіў, што ў выніку дабрапольскай контрнаступальнай апэрацыі ўкраінскае войска вызваліла больш за 174 квадратныя кілямэтры тэрыторыі.
«Дабрапольская контранаступальная апэрацыя працягваецца. [...] Нашым сілам удалося вызваліць ужо, і гэта ад пачатку апэрацыі, больш за 174 квадратныя кілямэтры, і больш за 194 кілямэтры былі ачышчаныя ад расейскіх дывэрсантаў. Расейскія страты толькі ў межах гэтай апэрацыі — амаль 3200, і большасьць — незваротныя страты», — адзначыў Уладзімір Зяленскі ўвечары 29 верасьня пасьля пасяджэньня стаўкі галоўнага вайскавода.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум