Пра магчымае правядзеньне сустрэчы Ўладзіміра Пуціна і прэзыдэнта ЗША Дональда Трампа стала вядома ўчора пасьля перамоваў Пуціна з прадстаўніком прэзыдэнта ЗША Стывам Уіткафам. Амэрыканскія СМІ са спасылкай на крыніцы паведамлялі, што яна можа адбыцца ўжо на наступным тыдні. Афіцыйна гэта не пацьвярджалася.
Ушакоў кажа, што саміт адбудзецца па прапанове амэрыканскага боку. Амэрыканскія крыніцы напярэдадні паведамлялі, што сустрэчу Пуціна і Трампа прапануе Крэмль. Дзяржсакратар ЗША Марка Рубіё ў сераду ў інтэрвію Fox News сказаў, што перад самітам Вашынгтон і Масква павінны «амаль цалкам узгадніць пазыцыі».
Па словах Ушакова, Масква пакуль што не рыхтуецца да трайных перамоваў Пуціна з Трампам і з прэзыдэнтам Украіны Ўладзімірам Зяленскім. Ён сьцьвярджае, што гэта было прапанавана Вашынгтонам. «Гэты варыянт канкрэтна не абмяркоўваўся. Расейскі бок гэты варыянт пакінуў зусім, цалкам без камэнтарыя», — сказаў дыплямат.
Што канкрэтна зьбіраюцца абмяркоўваць Трамп і Пуцін, пакуль афіцыйна не паведамлялася. Бакі таксама не раскрылі дэталяў сустрэчы Ўіткафа з Пуціным. У Крамлі заявілі, што размова была «карыснай і канструктыўнай» і Пуцін перадаў ЗША «некаторыя сыгналы па ўкраінскім пытаньні». Трамп ужо пасьля назваў сустрэчу Ўіткафа з Пуціным «высокапрадуктыўнай», дадаўшы, што «ўсе згодныя, што гэтая вайна павінна прыйсьці да завяршэньня, і мы зь нецярплівасьцю чакаем гэтага ў найбліжэйшыя дні і тыдні.
Bloomberg са спасылкай на крыніцы піша, што прэзыдэнт ЗША падчас тэлефоннай размовы зь лідэрамі шэрагу краін ЭЗ і прэзыдэнтам Украіны Ўладзімірам Зяленскім быў «настроены аптымістычна» па магчымасьці спыненьня агню ва Ўкраіне. Трамп таксама выказаў меркаваньне, што Пуцін будзе гатовы пачаць мірныя перамовы ў абмен на абмеркаваньне пытаньня аб абмене тэрыторыямі.
Пуцін, па дадзеных агенцтва, заявіў правы на ўкраінскі паўвостраў Крым, анэксаваны ў 2014 годзе, а таксама на Данецкую, Луганскую, Запароскую і Херсонскую вобласьці Украіны, часткі якіх акупавала расейскае войска. Ніводная з гэтых чатырох абласьцей не кантралюецца поўнасьцю Расеяй. Раней ЗША, як сьцьвярджаецца, прапаноўвалі Расеі прызнаць Крым расейскім і фактычна саступіць кантроль «над часткамі іншых украінскіх рэгіёнаў», а кантроль над раёнамі Запароскай і Херсонскай абласьцей вярнуць Украіне.
Польскае мэдыя Onet сьцьвярджае, што Ўіткаф абмяркоўваў з Пуціным прапанову ЗША аб спыненьні агню, узгодненую з лідэрамі эўрапейскіх краін. Паводле зьвестак выданьня, Масква атрымала «вельмі выгадную прапанову» ад адміністрацыі Трампа, якая ўключае: пагадненьне аб спыненьні агню, а ня мір з Украінай; прызнаньне захопленых Расеяй тэрыторый (рашэньне будзе адкладзена «на 49 або 99 гадоў»); а таксама зьняцьце большасьці санкцый.
Пры гэтым у пакеце, як сьцьвярджаецца, адсутнічаюць гарантыі непашырэньня NATO і спыненьня вайсковай падтрымкі Ўкраіне.
Улады ЗША, Украіны і Расеі пакуль не камэнтавалі інфармацыю СМІ і не пацьвярджалі яе. Дзяржсакратар ЗША Марка Рубіё раней заявіў, што «ключавымі элемэнтамі любога заканчэньня вайны будуць тэрытарыяльныя пытаньні». «Ёсьць тэрыторыі, якія Расея захапіла і якія яна цяпер кантралюе, у тым ліку Крым, — сказаў ён. — Павінны быць саступкі з боку расейцаў і, вядома, саступкі з боку ўкраінцаў. Так што гэта складана».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум