Расея ўначы атакавала Кіеў і Адэсу. Пад ударам радзільня і хуткая дапамога. Ёсьць ахвяры

абноўлена
Дым над Кіевам пасьля расейскага ўдару 10 чэрвеня 2025 году
Дым над Кіевам пасьля расейскага ўдару 10 чэрвеня 2025 году

У ноч на 10 чэрвеня Расея ўдарыла ракетамі і дронамі па Кіеве і Адэсе. Як мінімум два чалавекі загінулі.

У Адэсе ад расейскага ўдару бесьпілётнікамі загінулі два чалавекі, паведаміла абласная пракуратура, ня менш за дзевяць пацярпелі. Пашкоджаныя жылыя дамы, радзільня, станцыя хуткай мэдычнай дапамогі, прыватная клініка, спартовы комплекс, заапарк, чыгуначны вакзал, адэская кінастудыя а таксама прыватныя аўтамабілі.

Кіраўнік Адэскай абласной вайсковай адміністрацыі Алег Кіпер паведаміў, што цэлямі нападу былі радзільны дом, станцыя хуткай мэдычнай дапамогі і жылыя дамы. У радзільні пацярпелых няма, пацыенты і пэрсанал пасьпелі эвакуавацца.

Таксама разбураныя і пашкоджаныя жылыя дамы ў цэнтры гораду, дзе загінуў 59-гадовы мужчына. Цалкам зруйнаваны будынак станцыі хуткай дапамогі. Некаторыя машыны хуткай дапамогі пашкоджаныя. Сярод пэрсаналу ніхто не пацярпеў.

У выніку атакі дронамі і ракетамі на Кіеў загінула адна жанчына, а чатыры чалавекі пацярпелі. Удары былі нанесены па сямі зь дзесяці раёнаў украінскай сталіцы.

Па сталіцы Ўкраіны выпусьцілі больш за 300 дронаў і ракет.

Мэр Кіева Віталь Клічко паведаміў, што вораг «бесьперапынна тэрарызаваў Кіеў ударнымі дронамі, біў па цывільнай інфраструктуры, па мірных жыхарах гораду». Кіраўнік вайсковай гарадзкой адміністрацыі Цімур Ткачэнка дадаў, што ёсьць частковыя разбурэньні і ўзгараньні ў шматпавярховых і прыватных дамах, гарэлі аўтамабілі і складзкія памяшканьні.

У Галасееўскім раёне — разбурэньні ў бізнэс-цэнтры. У Абалонскім раёне гараць склады. У Саламянскім раёне абломкі дрона ўпалі на дах шматпавярховіку.

Пашкоджаньні атрымаў Сафійскі сабор.

Расейскія вайскоўцы рэгулярна з розных відаў узбраеньня атакуюць украінскія рэгіёны.

Кіраўніцтва Расеі адмаўляе, што расейская армія падчас поўнамаштабнай вайны наносіць мэтанакіраваныя ўдары па цывільнай інфраструктуры гарадоў і вёсак Украіны, забіваючы мірнае насельніцтва і разбураючы лякарні, школы, дзіцячыя садкі, аб’екты энэргетыкі і водазабесьпячэньня. Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расейскай Фэдэрацыі і падкрэсьліваюць, што яны маюць мэтанакіраваны характар.

Пашкоджаны дом у Абалонскім раёне Кіева пасьля атакі 10 чэрвеня
Пашкоджаны дом у Абалонскім раёне Кіева пасьля атакі 10 чэрвеня

Над Расеяй і Крымам зьбілі 103 ўкраінскія дроны — Міністэрства абароны РФ

Паводле расейскага Міністэрства абароны, за ноч над расейскай і акупаванай тэрыторыяй былі зьбітыя 103 ўкраінскія дроны самалётнага тыпу. У тым ліку ў Маскоўскай, Ленінградзкай вобласьцях і нават у Татарстане, гэта больш як тысяча кілямэтраў ад украінскай мяжы.

  • Белгарадзкая вобласьць — 20 бесьпілётнікаў
  • Бранская вобласьць — 46
  • Варонеская вобласьць — 9
  • Калуская вобласьць — 4
  • Курская вобласьць — 2
  • Ленінградзкая вобласьць — 3
  • Маскоўскі рэгіён — 3
  • Арлоўская вобласьць — 2
  • Рэспубліка Татарстан — 4
  • Смаленская вобласьць — 1
  • Крым — 9


​
XS
SM
MD
LG